भारतीय महिला क्रिकेट संघाने आयसीसी महिला विश्वचषक २०२५ मध्ये उपांत्य फेरीत प्रवेश करत ऐतिहासिक कामगिरी केली आहे. त्यांच्या या प्रवासात अनेक चढ-उतार होते, पण अखेर त्यांनी न्यूझीलंडविरुद्ध निर्णायक विजय मिळवून अंतिम चारमध्ये स्थान निश्चित केले. आता त्यांचा सामना गतविजेता आणि अपराजित ऑस्ट्रेलिया संघाशी ३० ऑक्टोबर रोजी नवी मुंबईतील डी. वाय. पाटील स्टेडियमवर होणार आहे. भारतीय संघाने स्पर्धेची सुरुवात श्रीलंका आणि पाकिस्तानविरुद्ध सलग विजयांनी केली. स्मृती मानधना, प्रतिका रावल आणि हरलीन देओल यांची फलंदाजीत चमकदार कामगिरी होती. मात्र, त्यानंतर दक्षिण आफ्रिका, इंग्लंड आणि ऑस्ट्रेलियाविरुद्ध सलग तीन पराभवांनी संघाला मोठा धक्का बसला.
या पराभवांनंतर न्यूझीलंडविरुद्धचा सामना ‘करो या मरो’ असा ठरला. स्मृती मानधना आणि प्रतिका रावल यांनी शतके झळकावून भारताला मोठी धावसंख्या उभारून दिली. गोलंदाजांनीही अचूक मारा करत न्यूझीलंडला ५३ धावांनी पराभूत केले.
भारतीय संघाचा सामना आता ऑस्ट्रेलियाशी होणार आहे. ऑस्ट्रेलिया संघाने साखळी फेरीत सातपैकी सहा सामने जिंकले असून एक सामना अनिर्णित राहिला. त्यांनी दक्षिण आफ्रिकेला ७ विकेट्सने पराभूत करत गुणतालिकेत अव्वल स्थान मिळवले.
विश्वचषकात भारतीय खेळाडूंची कामगिरी सातत्यपूर्ण राहिली आहे. स्मृती मानधनाने सलामीवीर म्हणून उल्लेखनीय कामगिरी केली. ऑस्ट्रेलियाविरुद्ध अर्धशतक आणि न्यूझीलंडविरुद्ध शतक झळकावले. प्रतिका रावल या नवोदित खेळाडूने न्यूझीलंडविरुद्ध १२२ धावांची दमदार खेळी केली. हरमनप्रीत कौरने कर्णधार म्हणून संघाला प्रेरणा देणारी भूमिका बजावली. दीप्ती शर्मा, रेणुका ठाकूर, स्नेह राणा यांनी गोलंदाजीत महत्त्वाची भूमिका बजावली आहे. भारतीय संघासाठी विश्वचषक आता केवळ दोन पावले दूर असून मुख्य अडथळा ऑस्ट्रेलिया आहे.
३० ऑक्टोबर रोजी होणारा उपांत्य सामना भारतासाठी अत्यंत निर्णायक आहे. पावसामुळे जर सामना पूर्णपणे रद्द झाला तर साखळी फेरीतील कामगिरीच्या आधारे ऑस्ट्रेलिया थेट अंतिम फेरीत प्रवेश करेल. उपांत्य फेरीत त्यांना बलाढ्य ऑस्ट्रेलियाशी सामना करावा लागणार असला तरी न्यूझीलंडविरुद्धच्या विजयामुळे त्यांचा आत्मविश्वास उंचावला आहे. आता संपूर्ण देशाचे लक्ष या सामन्याकडे लागले आहे, जिथे भारताला अंतिम फेरी गाठण्यासाठी सर्वोत्तम खेळी करावी लागेल. त्यामुळे भारताला पहिल्यांदाच विश्वचषक उंचावण्याची संधी निर्माण झाली आहे.
- प्रवीण साठे
