पणजी : म्हादई (mhadei) प्रश्नावर अभ्यास करण्यासाठी जलस्रोत खात्याचे मंत्री सुभाष शिरोडकर यांच्या अध्यक्षतेखाली स्थापन झालेल्या सभागृह समितीची बैठक उद्या दुपारी विधानभवनात होणार आहे. तब्बल ९ महिन्यानंतर ही बैठक होत असल्याने ती वादळी ठरण्याची शक्यता आहे. मागील बैठक १० जानेवारी २०२५ रोजी झाली होती.
कळसा - भांडुरा (Kalasa-Bandura) प्रकल्पासाठी कर्नाटककडून (karnataka) म्हादईचे पाणी वळविण्यासाठीचे सोपस्कार सुरूच आहेत. या पार्श्वभूमीवर कर्नाटकच्या प्रयत्नांना आळा घालण्यासाठी गोवा (Goa) सरकारकडून अलीकडच्या काळात फारशा हालचाली झालेल्या नाहीत. प्रवाह समितीची बैठकही झालेली नाही. सर्वोच्च न्यायालयात प्रलंबित असलेल्या याचिकांवरील सुनावणीही या तीन महिन्यात झालेली नाही. बैठकच होत नसल्याने मध्यंतरी विजय सरदेसाई यांनी सदस्यत्वाचा राजीनामा देण्याचा इशारा दिला होता.
म्हादई प्रश्नाचा अभ्यास करण्यासाठी २०२४ साली सभागृह समिती स्थापन करण्यात आली होती. आतापर्यंत समितीच्या दोन बैठका झालेल्या आहेत. आमदार विजय सरदेसाई, आमदार आलेक्स रेजिनाल्ड लॉरेन्स, आमदार निलेश काब्राल, मायकल लोबो, कार्लुस फेरेरा, डॉ. चंद्रकांत शेट्ये, देविया राणे, वेंझी व्हिएगस, प्रेमेंद शेट, जीत आरोलकर, विरेश बोरकर हे समितीचे इतर सदस्य आहेत.
