फातोर्डा पोलिसांना आले होते शरण
मडगाव : मुंगूल येथील गँगवॉरप्रकरणी फातोर्डा पोलिसांना शरण आलेल्या संशयित अमोघ नाईक, व्हॅली डिकोस्टा व प्रकाश करबार या मुख्य संशयितांना अटक करण्यात आली होती. त्यांना न्यायालयात हजर करण्यात आले असता, तिघांनाही चार दिवसांची पोलीस कोठडी सुनावण्यात आली. याप्रकरणी आतापर्यंत २८ संशयितांना अटक केली आहे.
मुंगूल येथील शगुन हॉटेलनजीक १२ ऑगस्ट रोजी गाडी अडवून तलवार, कोयता, सोडा बॉटल्सचा वापर करत संशयितांनी गोळीबारही केला होता. गुन्हेगारी जगतातील वर्चस्वासाठी हा हल्ला झाला होता. या गँगवॉरमध्ये संशयित वॉल्टर गँगचे रफीक ताशान (२४) व युवकेश सिंग बदैला (२०) हे गंभीर जखमी झाले होते. दक्षिण गोवा पोलीस अधीक्षक टिकमसिंग वर्मा यांच्या नेतृत्वाखाली विविध पथके तयार करत गँगवॉरमध्ये सहभागी संशयितांना अटक करण्यात आली. आतापर्यंत संशयित विल्सन कार्व्हालो, शाहरुख शेख (रा. दवर्ली), रसूल शेख (रा. मडगाव), मोहम्मद अली (२४), वासू कुमार (२४), सूरज माझी (१९), मलिक शेख (१८), गौरांग कोरगावकर (२४), सुनील बिलावर (२०, रा. घोगळ), जॉयस्टन फर्नांडिस (२०, नेरुल), इम्रान बेपारी (३८, रा. सांताक्रुझ), अक्षय तलवार (२२, रा. तळसाझर), अविनाश गुंजीकर (३१, रा. नावेली), परशुराम राठोड (३२, रा. बेळगाव), दीपक कट्टीमणी (४७, रा. आके बायश), अमर कुलाल, ताहीर, सलीम, महेंद्र नाईक (२१, रा. चिंबल), राहुल तलवार व अमोघ नाईक याचा सहकारी मंदार प्रभू गावकर (बोरी) व सूरज नाईक बोरकर, राजेश हेलमा, राजस्थान येथे पथक पाठवून बिश्नोई गँगशी संबंध असलेल्या व बंदूक पुरवल्याचा संशय असलेला ओमसा याला अटक केली. याप्रकरणी अमोघ नाईक याचा अटकपूर्व जामिनासाठीचा अर्ज फेटाळण्यात आला होता.
शुक्रवारी संशयित अमोघ नाईक, व्हॅली डिकोस्टा, प्रकाश करबार यांनी आपल्या वकिलांना सोबत घेऊन पोलिसांसमोर शरणागती पत्करली. तिन्ही संशयितांना फातोर्डा पोलिसांनी अटक केली होती. याप्रकरणी संशयित व्हॅली डिकोस्टा याने अटकपूर्व जामिनासाठी केलेला अर्ज मागे घेतला आहे. तिन्ही संशयितांना न्यायालयात हजर करण्यात आल्यानंतर चार दिवसांची पोलीस कोठडी सुनावण्यात आली.
तपासात त्रुटी राहिल्यास कारवाई होणार : वर्मा
पोलिस अधीक्षक टिकमसिंग वर्मा यांनी सांगितले की, मुंगूल येथील खुनाचा प्रयत्न केल्याप्रकरणात पूर्ववैमनस्यातून प्रकार घडल्याचे आतापर्यंतच्या तपासात दिसून आले. यापूर्वी सात वाहनांसह बंदूक, कोयता, हातोडा व इतर साहित्य जप्त केले आहे. तपासात काही त्रुटी राहिल्या असल्यास त्यावर कारवाई केली जाईल. चौकशीदरम्यान, ज्या संशयितांची नावे समोर आली त्या सर्वांना पोलिसांनी अटक केली असल्याचे त्यांनी स्पष्ट केले.
