जानेवारी २०२६ पर्यंत काम पूर्ण करण्याचे उद्दिष्ट
पणजी : गवंडाळी रेल्वे उड्डाणपुलाचे बांधकाम वेगाने सुरू असून, आतापर्यंत २५ टक्के काम पूर्ण झाले आहे. गोवा राज्य पायाभूत सुविधा विकास महामंडळाच्या अधिकाऱ्यांनी दिलेल्या माहितीनुसार, या उड्डाणपुलाची पायाभरणी पूर्ण झाली असून, कंत्राटदार जानेवारी २०२६ पर्यंत हे काम पूर्ण करण्याचा प्रयत्न करत आहेत.
या प्रकल्पासाठी ४५ कोटी रुपयांची निविदा काढण्यात आली. कामाचा वेग वाढवण्यासाठी २३ जूनपासून गवंडाळी येथील रस्ता वाहतुकीसाठी बंद करण्यात आला होता. सध्या हा रस्ता सकाळी आणि संध्याकाळी ५ वाजेनंतरच खुला असतो.
गेल्या वर्षी सेंट फ्रान्सिस झेवियरच्या शवदर्शन सोहळ्यामुळे या पुलाचे काम पुढे ढकलण्यात आले होते. मात्र, आता कामाच्या ठिकाणी मोठी यंत्रसामग्री कायमस्वरूपी उपलब्ध आहे. कामाचा सध्याचा वेग पाहता, हा पूल जानेवारी २०२६ पर्यंत पूर्ण होईल असा विश्वास जीएसआयडीसीच्या अधिकाऱ्यांनी व्यक्त केला आहे.
