सहा वाहने जप्त : अजूनही काहीजणांना अटक होण्याची शक्यता
मडगाव : मुंगूल येथील हल्ला व गोळीबारप्रकरणी फातोर्डा पोलिसांकडून जॉयस्टन फर्नांडिस (२०) याच्यानंतर संशयित अक्षय तलवार, इम्रान बेपारी, अविनाश गुंजीकर, परशुराम राठोड, दीपक कट्टिमणी यांना अटक केली. आतापर्यंत या प्रकरणात १८ जणांना अटक केली आहे. अजूनही काहीजणांना अटक होण्याची शक्यता आहे.
मुंगूल फातोर्डा येथील गँगवॉर प्रकरणात फातोर्डा पोलिसांनी गुरुवारी सुनील बिलावर (२०, रा. घोगळ, मडगाव) याला अटक केली होती. त्यानंतर शुक्रवारी पर्वरी पोलिसांनी या प्रकरणातील संशयित जॉयस्टन फर्नांडिस (२०) याला नेरुल येथून ताब्यात घेतले. संशयिताने गुन्ह्यात वापरलेली कारही जप्त केली. तर यापूर्वी अटक केलेल्या आठजण पोलीस कोठडीत आहेत. मुंगूल-माडेल येथे गाडी अडवून तलवार, कोयता, सोडा बॉटल्सचा वापर करत झालेल्या हल्लात रफीक ताशान (२४) व युवकेश सिंग बदैला (२०) हे गंभीर जखमी झाले होते. या हल्ल्यावेळी गोळीबारही करण्यात आला.
सोमवारपर्यंत पोलीस कोठडी
दक्षिण गोवा पोलिसांनी पाच संशयितांविरोधात लुकआऊट नोटीस काढली होती. यापूर्वी संशयित विल्सन कार्व्हालो, शाहरुख शेख (रा. दवर्ली), रसूल शेख (रा. मडगाव), मोहम्मद अली (२४), वासू कुमार (२४), सूरज माझी (१९), मलिक शेख (१८), गौरांग कोरगावकर (२४) यांना अटक केली होती. आठही संशयितांना न्यायालयात हजर केल्यानंतर सोमवारपर्यंत पोलीस कोठडी सुनावण्यात आलेली आहे. या प्रकरणात आणखीही काही अटक होण्याची शक्यता आहे.
