म्हापसा : गिरी-म्हापसा येथील ग्रीनपार्क जंक्शनजवळील उड्डाणपुलाजवळ एका प्रवासी बसने स्कुटरला धडक दिल्याने भीषण अपघात झाला. या अपघातात बसखाली चिरडल्याने कायदा विभागाचे अवर सचिव नारायण अभ्यंकर (५१, रा. रामनगर, कोलवाळ, बार्देश) यांचा जागीच मृत्यू झाला. अभ्यंकर हे त्यांच्या सुस्वभावी आणि शांत स्वभावामुळे ओळखले जात होते आणि ते पर्वरी येथील सचिवालयात कार्यरत होते.
हा अपघात मंगळवारी सकाळी १०.४५ च्या सुमारास घडला. नारायण अभ्यंकर हे त्यांच्या जीए ०३ एएस ८८३६ क्रमांकाच्या ज्युपिटर स्कुटरवरून कोलवाळहून पर्वरी येथील सचिवालयाकडे जात होते. त्याचवेळी, जीए ०७ एफ ५६७९ क्रमांकाची प्रवासी बस घेऊन चालक प्रेमानंद कानोजी म्हापसा येथून पणजीकडे जात होते. स्कुटरस्वार अभ्यंकर यांनी ग्रीनपार्क उड्डाणपूल ओलांडल्यानंतर काही अंतरावर सर्व्हिस रोडवरून महामार्गावर येणाऱ्या प्रवासी बसने त्यांच्या स्कुटरला धडक दिली. या धडकेमुळे अभ्यंकर यांचे स्कुटरवरील नियंत्रण सुटले आणि ते डाव्या बाजूला बसखाली कोसळले, ज्यामुळे चाकाखाली चिरडले गेले. त्यांची स्कुटर उजव्या बाजूने जवळपास १० मीटरवर जाऊन दुभाजकाजवळ कोसळली.
अपघातानंतर महामार्गावरील वाहतूक मोठ्या प्रमाणात खोळंबली. घटनेची माहिती मिळताच म्हापसा पोलिसांनी तत्काळ घटनास्थळी धाव घेतली. पोलीस निरीक्षक निखील पालेकर यांच्या मार्गदर्शनाखाली उपनिरीक्षक दत्तप्रसाद पंडित आणि हवालदार सागर आगरवाडेकर यांनी अपघाताचा पंचनामा केला आणि संशयित बस चालकाला ताब्यात घेतले. पंचनाम्यानंतर मृतदेह गोमेकॉमध्ये शवविच्छेदनासाठी पाठवण्यात आला. संध्याकाळी शवविच्छेदन झाल्यानंतर मृतदेह कुटुंबीयांच्या स्वाधीन करण्यात आला. अपघातग्रस्त वाहने हटवल्यानंतर वाहतूक पोलिसांनी महामार्गावरील वाहतूक सुरळीत केली. वाहतूक पोलीस अधीक्षक प्रबोध शिरवईकर यांनी देखील घटनास्थळी भेट देऊन पाहणी केली.
सचिवालयाकडे जात असताना अपघात
