दामू नाईक दिल्लीतून परतले; गावडेंशी आज करणार चर्चा!

पणजी

मंत्री गावडे यांची बाजू ऐकून घेतल्यानंतर त्यासंदर्भातील अहवाल दामू पक्षश्रेष्ठींपर्यंत पोहोचवतील. त्यानंतर पक्षश्रेष्ठींकडून हिरवा कंदील मिळाल्यानंतर मंत्री गावडे यांच्यावर कारवाई करण्यात येईल, अशी माहिती भाजपातील सूत्रांनी रविवारी 'गोवन वार्ता'शी बोलताना ​​दिली.

मंत्री गोविंद गावडे यांनी आदिवासी कल्याण खात्याच्या कारभारावर टीकास्र सोडले, त्या काळात प्रदेशाध्यक्ष दामू नाईक गोव्याबाहेर होते. पण, गावडेंनी पक्षाच्या शिस्तीचा भंग केल्याने यावेळी त्यांच्यावर निश्चित कारवाई होईल. गोव्यात आल्यानंतर आपण त्यांच्याशी चर्चा करू आणि त्यानंतर कारवाई करू, अशी हमी नाईक यांनी दिली होती.

गोविंद गावडे यांनी आदिवासी कल्याण खात्याच्या कारभाराबाबत जी भूमिका मांडली, ती संपूर्ण आदिवासी समाजाची होती. याचा विचार करून सरकार किंवा भाजपने गोविंद गावडे यांना मंत्रिमंडळातून वगळू नये, असे म्हणत 'उटा' संघटनेने सरकारवर दबाव आणण्याचे प्रयत्न सुरू केले आहेत. याची पूर्ण माहिती दामू नाईक यांनी पक्षश्रेष्ठींना दिली आहे.

सोमवारी अपेक्षित घडामोडी

• दामू नाईक दिल्ली दौऱ्यानंतर गोव्यात परतले; मंत्री गोविंद गावडे यांच्याशी आदिवासी कल्याण खात्याच्या कारभाराविषयी चर्चा करणार.
• गावडेंच्या बाजूचा अहवाल दामू नाईक पक्षश्रेष्ठींना सादर करतील; त्यानंतर कारवाईसाठी अंतिम निर्णय होणार.
• 'उटा' संघटनेच्या दबावाखाली सरकार आणि भाजपची भूमिका महत्त्वाची; सोमवारी या प्रकरणात पुढील स्पष्टता मिळणार.