आरोपपत्र दाखल केले नसल्याचा मुद्दा केला उपस्थित
पणजी : फातोर्डा-मडगाव ते लंडनपर्यंत प्रकरणाची व्याप्ती असलेल्या १३० कोटींच्या गुंतवणूक घोटाळ्यातील मुख्य संशयित मायरन राॅड्रिग्ज याची पत्नी दीपाली परब (४२, कल्याण-मुंबई) हिला गुन्हा शाखेने अटक केली होती. या प्रकरणी न्यायालयात आरोपपत्र दाखल केले नसल्याचा मुद्दा उपस्थित करून दीपाली परब हिने मडगाव येथील दक्षिण गोवा जिल्हा व सत्र न्यायालयात जामीन अर्ज दाखल केला आहे. या प्रकरणाची पुढील सुनावणी १२ मे रोजी होणार आहे.
गुंतवणूकदारांच्या तक्रारीवरुन आर्थिक गुन्हा विभागाने (ईओसी) २०२३ मध्ये संशयित मायरन राॅड्रिग्ज आणि त्याची पत्नी दीपाली परब यांच्याविरोधात दोन गुन्हे दाखल केले होते. दोन्ही गुन्ह्यांत संशयितांनी सुमारे ३८ गुंतवणूकदारांना सुमारे २५ कोटी रुपयांना फसवले होते. चौकशीत मायरनच्या बँक खात्यात २००९ ते १७ ऑगस्ट २०२३ या काळात १३० कोटी रुपयांचा व्यवहार झाल्याचे दिसून आले.
दरम्यान, ईओसीने मायरन राॅड्रिग्ज याच्यासह त्याची पहिली पत्नी सुनीता आणि दुसरी पत्नी दीपाली परब यांच्या तीन बँक लाॅकरातून ३ कोटी रुपयांच्या ४.१२५ किलो दागिन्यांसह मालमत्तेची अस्सल कागदपत्रे जप्त केली. त्यानंतर हे प्रकरण गुन्हा शाखेकडे वर्ग करण्यात आले. या प्रकरणी गुन्हा शाखेने राॅड्रिग्ज याची पहिली पत्नी सुनीता राॅड्रिग्जला अटक केली होती. तिला मडगाव येथील प्रथमवर्ग न्यायालयाने सशर्त जामीन मंजूर केला. त्यानंतर गुन्हा शाखेने मायरन याची दुसरी पत्नी दीपाली परब हिला अटक केली. दीपाली परबला न्यायालयाने प्रथम पोलीस कोठडी ठोठावली. ती संपल्यानंतर तिची न्यायालयीन कोठडी रवानगी केली.
गुन्हा शाखेकडे असलेल्या प्रकरणात अर्ज दाखल
ईओसीने मायरन राॅड्रिग्ज याची दुसरी पत्नी दीपाली परब हिच्या विरोधात आरोपपत्र दाखल केले. या प्रकरणी दीपाली परब हिचा जामीन अर्ज न्यायालयाने फेटाळून लावला. तर, गुन्हा शाखेकडे असलेल्या प्रकरणात दीपाली परब हिने न्यायालयात जामीन अर्ज दाखल केला. त्यात तिने वरील प्रकरणात आरोपपत्र दाखल केले नसल्याचा दावा करून जामीन मंजूर करण्याची मागणी केली आहे. या प्रकरणाची पुढील सुनावणी १२ रोजी होणार आहे.
