पणजी : पहलगाम येथे झालेल्या दहशतवादी हल्ल्यानंतर देशभरात सुरक्षा उपाययोजना अधिक कडक करण्यात आल्या आहेत. दरम्यान केंद्रीय गृह मंत्रालयाच्या आदेशानुसार गोव्यातील अल्पकालीन व्हिसावर वास्तव्यास असलेल्या तीन पाकिस्तानी नागरिकांनी गोवा सोडल्याची माहिती मुख्यमंत्री डॉ. प्रमोद सावंत यांनी दिली.
गोव्यात सध्या तीन पाकिस्तानी नागरिक अल्पकालीन व्हिसावर आणि १७ नागरिक दीर्घकालीन व्हिसावर वास्तव्यास आहेत. देशभरात पाकिस्तानी नागरिकांना देश सोडण्याचे आदेश दिल्यानंतर गोव्यातील तीन अल्पकालीन व्हिसाधारकांनी आपली गोव्यातील वास्तव्य संपुष्टात आणले असून ते पाकिस्तानकडे रवाना झाले आहेत.
सुरक्षा उपाययोजना आणि तपासणी
गोवा सरकारने कोम्बिंग ऑपरेशन आणि नाकाबंदी सुरू केली आहे. स्थलांतरित कामगार आणि भाडेकरूंची तपासणी सुरू असून आतापर्यंत तीन हजार लोकांची तपासणी करण्यात आली आहे. आज संध्याकाळपर्यंत तपासणीचा संपूर्ण अहवाल उपलब्ध होईल, असेही त्यांनी सांगितले. पहलगाम हल्ल्यानंतर घेतलेल्या या उपाययोजनांमुळे राज्यात सुरक्षेचा सशक्त बंदोबस्त करण्यात आला आहे आणि कोणतीही शंका असलेल्या व्यक्तींवर नजर ठेवण्यात येत आहे.
