५ दिवसांपूर्वी झालेल्या रेल्वे अपहरणात २८ सैनिक आणि ३३ बलुच सैनिकांचा मृत्यू झाला होता
बलुचिस्तान : बलुच लिबरेशन आर्मी (बीएलए) ने आज रविवारी सकाळी पाकिस्तानी सैन्यावर आत्मघातकी हल्ला केल्याचा दावा केला. यामध्ये ९० पाकिस्तानी सैनिक मारले गेले आहेत. नोश्की येथील महामार्गावर क्वेट्टाहून कफ्तानला जाणाऱ्या आठ लष्करी वाहनांवर हा हल्ला करण्यात आला. बीएलएच्या मते, त्यांच्या माजीद आणि फतेह ब्रिगेडने लष्कराच्या ताफ्यावर आत्मघातकी बॉम्बस्फोट घडवून आणला.
मिळालेल्या माहितीनुसार, एका आत्मघातकी सैनिकाने स्फोटकांनी भरलेल्या वाहनाने लष्कराच्या ताफ्याला धडक दिली. यानंतर, फतेह पथकाने लष्कराच्या ताफ्यात घुसून हल्ला केला. ज्या वाहनावर आत्मघातकी हल्ला करण्यात आला तो पूर्णपणे उद्ध्वस्त झाला. जखमींना नोश्की येथील रुग्णालयात दाखल करण्यात आले आहे. परिसरात आणीबाणी लागू करण्यात आली आहे.
दरम्यान, पाकिस्तानी पोलिसांनी जारी केलेल्या माहितीनुसार, रस्त्याजवळ पडलेला बॉम्ब फुटला. सैनिकांना घेऊन जाणाऱ्या एका बसला त्याची झळ बसली. या हल्ल्यात पाच पाकिस्तानी सैनिक ठार झाले आणि १० जण जखमी झाले. मृत आणि जखमींना रुग्णालयात नेण्यात आले आहे.
५ दिवसांपूर्वी बीएलएने पाकिस्तानमध्ये एका प्रवासी ट्रेनचे अपहरण केले होते. बीएलएने ट्रेनमध्ये ओलिस ठेवलेल्या २१४ पाकिस्तानी लष्करी जवानांना ठार मारल्याचा दावा केला होता. दरम्यान, त्यांचे फक्त २८ सैनिक मारले गेले, तर सर्व ३३ बलुच सैनिक मारले गेले असे पाकिस्तानी सैन्याने म्हटले होते.
सिडनीस्थित इन्स्टिट्यूट फॉर इकॉनॉमिक्स अँड पीसने जारी केलेल्या ग्लोबल टेररिझम इंडेक्स अहवाल २०२५ मध्ये, पाकिस्तानला जगातील दुसऱ्या क्रमांकाचा सर्वाधिक दहशतवादग्रस्त देश म्हणून वर्णन केले आहे. अहवालानुसार, पाकिस्तानातील खैबर पख्तूनख्वा आणि बलुचिस्तान हे सर्वात मोठे दहशतवादग्रस्त क्षेत्र आहेत. देशभरातील एकूण दहशतवादी घटनांपैकी ९०% घटना याच भागात घडल्या.
या अहवालात सलग दुसऱ्या वर्षी तहरीक-ए-तालिबान पाकिस्तानला पाकिस्तानातील सर्वात धोकादायक दहशतवादी संघटना म्हणून घोषित करण्यात आले आहे. २०२४ मध्ये, या गटाने ४८२ हल्ले केले, त्यामध्ये ५५८ मृत्यू झाले. हा आकडा २०२३ च्या तुलनेत ९१% जास्त आहे.
