३ अल्पवयीन मुलांचा समावेश, मानवी तस्करीचा संशय.
मुंबई : हरियाणातील एका खाजगी विद्यापीठाच्या प्राध्यापकाला मुंबई आंतरराष्ट्रीय विमानतळावर अटक करण्यात आली आहे. तो पंजाब आणि हरियाणा येथील ७ तरुणांना ब्रिटनला घेऊन जात होता. यामध्ये ३ अल्पवयीन मुलांचाही समावेश आहे.
सोमवारी दुपारी १२.३० वाजताच्या सुमारास, दोन तरुण मुंबई विमानतळावरील इमिग्रेशन काउंटरवर आले आणि त्यांनी नियमित प्रक्रियेनुसार पडताळणीसाठी त्यांचे पासपोर्ट आणि व्हिसा दाखवले. त्याच्याकडे युकेला जाण्यासाठी व्हिजिट व्हिसा होता. विचारलेल्या प्रश्नांची दोघेही समर्पक उत्तरे देऊ शकले नाहीत. यानंतर, अधिकाऱ्याने त्याच्या वरिष्ठांना कळवले.
तपासात २ नाही तर ७ तरुण असल्याचे समोर आले.
अन्य एका अधिकाऱ्याला दुसऱ्या इमिग्रेशन काउंटरवर त्याच प्राध्यापकासोबत आणखी पाच तरुण लंडनला जात असल्याचे आढळले. चौकशी केली असता, प्राध्यापकाने दावा केला की तो हरियाणा विद्यापीठातील व्होकेशन डिपार्टमेंट प्रमुखाच्या दोन सहकाऱ्यांच्या सांगण्यावरून काम करत होता. यापूर्वी, त्याने दिल्लीतील एका हॉटेलमध्ये बिट्टू नावाच्या एजंट आणि युकेमध्ये स्थायिक होऊ इच्छिणाऱ्या सात तरुणांशी बैठक घेतली होती.
२० लाख रुपयांचा व्यवहार उघडकीस आला.
पोलीस चौकशीदरम्यान, सदर प्राध्यापकाने सांगितल्यानुसार, बिट्टूने प्रत्येक तरुणाकडून २० लाख रुपये घेतले होते. यानंतर प्राध्यापक दिल्लीहून ७ तरुणांना मुंबईत घेऊन आला. पुढे तो त्यांच्यासोबत जेद्दाह मार्गे लंडनला जाणार होते. अल्पवयीन मुलाच्या पालकांना माहिती देण्यात आली आहे असे पोलिसांनी सांगितले.
दरम्यान प्राध्यापकला व्हिसा मिळवण्यासाठी खोटी माहिती दिल्याच्या संशयावरून अटक करण्यात आली. पोलिसांच्या म्हणण्यानुसार, प्राथमिक तपासात हे प्रकरण मानवी तस्करीचे असल्याचे दिसून येत आहे. सर्व ७ तरुणांनाही ताब्यात घेण्यात आले होते परंतु नंतर न्यायालयाच्या आदेशानुसार त्यांना सोडून देण्यात आले. तथापि, प्राध्यापकाने उल्लेख केलेल्या विद्यापीठाकडून अद्याप त्याच्या सत्यतेबाबत पुष्टी झालेली नाही.
