मागणीनुसार किंमत ठरत असल्याने भाकित करणेही होते अशक्य
पणजी : पर्यटन, सेकंड होम व राज्यात आता थोडीच जमीन शिल्लक असल्याने जमिनींच्या किमती भरमसाट वाढत आहेत. मागणीनुसार जमीन व फ्लॅटचे दर ठरत असल्याने किमतीबाबत भाकित करणे वा सरासरी दर सांगणेही अशक्य होत आहे, अशी माहिती रिअल इस्टेट व्यावसायिक तथा बिल्डरांकडून मिळाली.
मयडे-बार्देश येथील अालिशान व्हिला १०५ कोटींना सूचीबद्ध केला आहे. यावरून राज्यातील जमिनी, फ्लॅट, घरांचे दर गगनाला भिडल्याचा अंदाज येतो. याबाबत बांधकाम व्यावसायिक देश प्रभुदेसाई म्हणाले, दोना पावल (पणजी) व आसपासच्या भागात जमिनीचा दर १ लाख ५० हजार रुपये प्रति चौ.मी. आहे. यावरून फ्लॅटच्या दराचा अंदाज येतो. मडगावात जमिनीचा दर सरासरी ६५ हजार रुपये चौ.मी. आहे. किनारपट्टी भागात किमती जास्त आहेत. एखादे स्थळ वा जमीन आवडली तर सिलेब्रिटी तथा धनाढ्य व्यक्ती कितीही किंमत मोजण्यास तयार असते. मयडे येथील व्हिलाचा दर १०५ कोटींना सूचीबद्ध करण्यामागे हाच हेतू आहे.
लोकचळवळीतील मागण्यांची पूर्तता केल्यास दरावर नियंत्रण शक्य : फेर्दीन रिबेलो
नगरनियोजन कायद्यातील कलम १७ (२) व ३९ (अ) रद्द करणे, परप्रांतीयांना जमीन विकण्यावर बंदी घालणे, शेतजमिनीचे रूपांतरण बंद करणे, प्रादेशिक आराखड्या प्रमाणे बांधकामांना मान्यता देणे या मागण्यांची कार्यवाही झाली तर जमिनींचे दर निश्चित घटतील. लोकचळवळ सभेनंतर सरकारला मागण्यांचे निवेदन सादर केले आहे. मुख्यमंत्र्यांसोबत चर्चाही झाली आहे, असे निवृत्त न्यायाधीश फेर्दिन रिबेलो यांनी सांगितले.
जमीन खरेदीतील स्पर्धेचाही परिणाम
दिल्ली, परप्रांतीयांमध्येही गोव्यात जमीन खरेदी करण्याबाबत स्पर्धा सुरू आहे. एकाने प्लॉट वा जमीन खरेदी केली तर त्याच्या परिचिताकडून गोव्यात प्लॉटची खरेदी केली जाते. एकाने ‘सेकंड होम’ बांधले तर दुसरा बांधायचा विचार करू लागतो. या स्पर्धेमुळेही जमीन वा घरांचे दर वाढत आहेत. फोंड्यात वर्षापूर्वी १५ हजार चौ.मी. दर होता, तो आता २५ ते ३० हजार चौ.मी. वर पोहोचला आहे. फोंडा परिसरातील जमिनींचेर दरही वाढत आहेत, असे राज हाऊसिंग कंपनीचे मालक संदीप निगळ्ये यांनी सांगितले.
