शुभमन गिल अव्वलस्थानी : रोहितही टॉप ३ मध्ये
दुबई : पाकिस्तान आणि दुबईत नुकत्याच पार पडलेल्या चॅम्पियन्स ट्रॉफीत भारताने न्यूझीलंडला पराभूत करत विक्रमी तिसऱ्यांदा ही स्पर्धा जिंकली. या जेतेपदाबरोबरच ताज्या एकदिवसीय क्रमवारीत भारतीय खेळाडूंचे वर्चस्व पाहायला मिळत आहे. सलामीवीर शुभमन गिलने आपले अव्वल स्थान कायम राखले आहे, तर चॅम्पियन्स ट्रॉफिच्या अंतिम सामन्यात सामनावीर ठरलेल्या कर्णधार रोहित शर्माने तिसरे स्थान पटकावले आहे.चॅम्पियन्स ट्रॉफीमधील कामगिरीनंतर सलामीवीर शुभमन गिल एकदिवसीय फलंदाजांच्या क्रमवारीत अव्वल स्थानावर कायम राहिला आहे, तर अंतिम सामन्यात सामनावीर ठरलेल्या कर्णधार रोहित शर्मा या यादीत दोन स्थानांनी झेप घेत तिसरे स्थान गाठले आहे. दरम्यान चॅम्पियन्स ट्रॉफीत २१८ धावा करणारा विराट कोहली फलंदाजी क्रमवारीत पाचव्या स्थानी आहे.
दुसरीकडे चॅम्पियन्स ट्रॉफीचे उपविजेते न्यूझीलंड संघाच्या फलंदाजांनीही एकदिवसीय क्रमवारीत चांगलीच प्रगती केल्याचे पाहायला मिळत आहे. न्यूझीलंडचा मधल्या फळीतील फलंदाज डॅरिल मिशेलने एका स्थानाने प्रगती करत सहाव्या स्थानावर झेप घेतली, तर राचिन रवींद्रने सातत्यपूर्ण कामगिरीसह १४ स्थानांनी प्रगती करत १४ व्या स्थानावर झेप घेतली. अष्टपैलू ग्लेन फिलिप्सनेही सहा स्थानांनी प्रगती करत २४ व्या स्थानावर झेप घेतली. क्रमवारीत त्याचा पहिल्यांदाच अव्वल २५ फलंदाजांमध्ये समावेश झाला आहे.
रोहित शर्माला मोठा फायदा
चॅम्पियन्स ट्रॉफीच्या अंतिम सामन्यात ७६ धावांची खेळी करणाऱ्या रोहित शर्माने आयसीसीच्या ताज्या एकदिवसीय क्रमवारीत मोठी झेप घेतली. रोहितने दोन स्थानांनी प्रगती करत तिसरे स्थान पटकावले आहे. रोहितने २०२५ च्या चॅम्पियन्स ट्रॉफीमध्ये भारतासाठी चमकदार कामगिरी करणारा विराट कोहली आणि हेनरिक क्लासेन यांना मागे टाकले आहे. रोहितचे रेटिंग ७५६ पर्यंत वाढले आहे. क्लासेन एका स्थानाने घसरून चौथ्या स्थानावर पोहोचला आहे तर विराट पाचव्या स्थानावर घसरला आहे.
शुभमन गिल आघाडीवर
भारताचा युवा सलामीवीर शुभमन गिल या क्रमवारीत अव्वल स्थानावर आहे. त्याचे रेटिंग ७८४ आहे. पाकिस्तानचा स्टार फलंदाज बाबर आझम दुसऱ्या क्रमांकावर आहे. न्यूझीलंडच्या डॅरिल मिशेलला एका स्थानाचा फायदा झाला आहे. तो आता ७२१ रेटिंग गुणांसह सहाव्या स्थानावर पोहोचला आहे. आयर्लंडचा हॅरी टेक्टर एका स्थानाने घसरून ७ व्या क्रमांकावर आला आहे. २०२५ च्या चॅम्पियन्स ट्रॉफीमध्ये भारताकडून सर्वाधिक धावा करणारा श्रेयस अय्यर आठव्या स्थानावर आहे. श्रीलंकेचा चरिथ असलंका ६९४ रेटिंगसह नवव्या क्रमांकावर आहे, तर अफगाणिस्तानचा इब्राहिम झद्रान ६७६ रेटिंग गुणांसह १० व्या क्रमांकावर आहे.
एकदिवसीय गोलंदाजी क्रमावारीत न्यूझीलंडचा कर्णधार मिशेल सँटनरने सहा स्थानांची झेप घेत थेट दुसरे स्थान गाठले आहे. त्याने चॅम्पियन्स ट्रॉफी स्पर्धेत ९ बळी मिळवत संघाला अंतिम फेरीपर्यंत नेले होते. दुसरीकडे सँटनर संघ सहकारी मायकेल ब्रेसवेलनेही १० स्थानांनी प्रगती करत १८ वे स्थान मिळवले आहे. या ताज्या क्रमवारीत भारताची फिरकी जोडी कुलदीप यादव आणि रवींद्र जडेजानेही आपला ठसा उमटवला आहे. चॅम्पियन्स ट्रॉफीत सात बळी घेणाऱ्या कुलदीप यादवने तीन स्थानांनी प्रगती करत तिसऱ्या स्थानावर झेप घेतली असून, रवींद्र जडेजाने १० वे स्थान मिळवले आहे.
अष्टपैलू खेळाडूंमध्ये उमरझाई अव्वल
अष्टपैलू खेळाडूंच्या क्रमवारीत अफगाणिस्तानचा अझमतुल्लाह उमरझाईने आपले अव्वल स्थान कायम राखले आहे. तर, सँटनर चौथ्या, ब्रेसवेल सातव्या आणि रवींद्र आठव्या स्थानावर पोहोचले आहेत. यामध्ये दुसऱ्या स्थानावर मोहम्मद नबी तर चौथ्या स्थानावर सिकंदर रझा आहेत.
सांघिक क्रमवारीत भारत अव्वल
दरम्यान सांघिक क्रमवारीत भारत अव्वल स्थानी असून, ऑस्ट्रेलिया आणि पाकिस्तान अनुक्रमे दुसऱ्या आणि तिसऱ्या स्थानी आहेत. यामध्ये न्यूझीलंड चौथ्या आणि दक्षिण आफ्रिका पाचव्या स्थानी आहेत.
