अज्ञात टोपीबाजांनी कोट्यवधी रूपयांच्या परताव्याचे आमिष दाखवून त्यांना अनेक विमा पॉलिसी घेण्यास भाग पाडले. ज्यादा पैशाच्या आमिषाला भुलल्याने महिला बँक मॅनेजरला मनस्ताप सहन करावा लागला.
पुणे : तंत्रज्ञान हे दुधारी शस्त्र आहे. या मुळे मानवजातीला जेवढी मदत होते त्याच्या दुप्पट नुकसान होत आहे. गेल्या काही वर्षांपासून तंत्रज्ञानाचा वापर करून सध्या भोळ्या लोकांचा गैरफायदा उठवत लाखों-करोडो रुपये उकळले जात आहेत. इवल्याशा गोव्यात काल २४ जानेवारी रोजीच सायबर फसवणुकीचे तब्बल १० गुन्हे नोंद झालेत. स्कॅमर्स सध्या जेष्ठ नागरिक आणि महिलांना कुरियर, विमा पॉलिसी आणि तत्सम मार्गांनी फसवत आहेत.
दरम्यान पुण्यातून असाच एक प्रकार समोर आला आहे. येथे एका निवृत्त महिला बँक मॅनेजरला आपण सरकारी अधिकारी असल्याची बतावणी करत एका भामट्याने विमा पॉलिसी विकल्या. पॉलिसी मॅच्युअर झाल्यानंतर नॉर्मल पॉलिसीपेक्षा चौपट परताव्याचे आमिष तिला दाखवण्यात आले. हा प्रकार अनेक महीने चालला. या दरम्यान सदर महिलेने सरकारी अधिकारी असल्याचा बनाव करणाऱ्या व्यक्तीच्या गोड बोलण्यावर भाळत कोट्यवधी रुपये गुंतवले व अनेक पॉलिसी विकत घेतल्या. दरम्यान एक दिवस सदर व्यक्तीचा फोन स्विच्ड ऑफ आल्यानंतर महिलेच्या मनात पाल चुकचुकली आणि तिला आपला घात झाल्याचे समझले.
समोर आलेल्या महितीनुसार, या प्रकारची सुरुवात २०२३ साली सुरू झाली. हा प्रकार अगदी अलीकडे देखील सुरूच होता. सर्वप्रथम स्वतःला सरकारी अधिकारी म्हणवणाऱ्या अनेक व्यक्तींकडून या पीडित महिलेला कॉल आले. यात त्यांनी आपण वित्त मंत्रालय, भारतीय विमा नियामक आणि विकास प्राधिकरण, नॅशनल पेमेंट्स कॉर्पोरेशन ऑफ इंडिया आणि तत्सम एजन्सींचे प्रतिनिधी या नात्याने बोलत असल्याची बतावणी केली. सुरुवातीच्या काही संभाषणानंतर त्यांनी पीडित महिलेला काही पॉलिसी ऑफर केल्या.
आपली विश्वासार्हता सिद्ध करण्यासाठी त्यांनी या एजन्सीमधील अनेक मोठ्या व्यक्तींची नावे घेतली. याच बरोबर वित्त तज्ञ आणि सरकारी अधिकाऱ्यांच्या काल्पनिक पदव्यांचाही गैरवापर केला. कॉल्स इतके खात्रीशीर होते की पीडितेने त्यांच्यावर विश्वास ठेवला. कालांतराने, पीडितेला विविध विमा पॉलिसी खरेदी करण्यास प्रवृत्त केले गेले आणि जीएसटी, प्राप्तिकर, टीडीएस, व्यवहार शुल्क, पडताळणी शुल्क आणि एनओसी शुल्क यासह अनेक प्रकारचे शुल्क भरण्यास सांगितले.
पोलिसांनी याबाबत दिलेल्या अहवालानुसार, हे भामटे तब्बल १९ वेगवेगळ्या नावांनी कार्यरत होते. यादरम्यान व्हॉईस मॉडयूलेशन आणि तत्सम तंत्रज्ञान वापरले गेले. त्यांनी दिलेल्या सुचनांचे पालन करत सदर महिलेने तब्बल ३०-३५ वेळा पैसे पाठवले. यानंतर अतिरिक्त शुल्क, रिफंड आणि तत्सम गोष्टीसाठी बतावण्या करून अजून काही लाख उकळले. जस व्याप वाढत गेला तसे या महिलेस या भामट्यांनी नवनवीन अधिकाऱ्यांच्या नावे कॉल केला. तुम्ही जमा केलेले पैसे हे गुन्हेगारी कारवायांसाठी वापरले जात आहेत. यातून बाहेर पडायचे असल्यास अजून पैसे जमा करा असे या नव्या अधिकाऱ्याने सांगितले. यात ३० लाख रुपये गेले.
यानंतर तिने आपल्या मुलांशी आणि नातेवाईकांशी याबाबत चर्चा केली. तिला आपली फसवणूक झाल्याचे लक्षात येताच तिने या अधिकाऱ्यांना कॉल करण्याचा प्रयत्न केला. मोबाइल स्विच्ड ऑफ आल्याने तिचा संशय बळावला व तिला आपली फसवणूक झाल्याचे लक्षात आले. तो पर्यंत खूप उशीर झाला होता. महिलेने तब्बल २.२२ कोटी रुपये १५ महिन्यांच्या कालावधीत गमावले. पोलिसांनी याबाबत तपास सुरू केला असून मनीट्रेल कुठपर्यंत जाते याचा शोध घेतला जात आहे.
