सियालदह न्यायालयाने सर्व साक्षी आणि पुराव्यांना ग्राह्य धरत नोंदवले निरीक्षण, सोमवारी होणार शिक्षेवर सुनावणी
कोलकाता : येथील सियालदह सत्र न्यायालयाने आज शनिवारी १८ जानेवारी रोजी आरजी कार बलात्कार प्रकरणात महत्त्वपूर्ण निकाल दिला. आरजी कार मेडिकल कॉलेजच्या महिला प्रशिक्षणार्थी डॉक्टरवर बलात्कार आणि हत्या केल्याप्रकरणी न्यायालयाने संजय रॉयला दोषी ठरवले. न्यायाधीश अनिर्बन दास यांनी हा निर्णय दिला. गेल्या वर्षी ९ ऑगस्ट रोजी रुग्णालयाच्या सेमिनार हॉलमध्ये ३१ वर्षीय प्रशिक्षणार्थी डॉक्टरचा मृतदेह अर्धनग्न अवस्थेत आढळून आला होता. या घटनेनंतर देशभरातून संताप व्यक्त करण्यात आला.
कोलकाता पोलिसांनी सीसीटीव्ही फुटेज आणि घटनास्थळावरून मिळालेल्या पुराव्याच्या आधारे आरोपी नागरी स्वयंसेवक संजय रॉयला अटक केली होती. या प्रकरणाचे गांभीर्य लक्षात घेऊन कोलकाता उच्च न्यायालयाने ते सीबीआयकडे सोपवले. तपास यंत्रणेने आपल्या आरोपपत्रात संजयचे मुख्य आरोपी म्हणून नाव दिले आणि त्याला फाशीची शिक्षा देण्याची मागणी न्यायालयाकडे केली.
न्यायासाठी कोलकात्यात दीर्घकाळ निदर्शने झाली. उच्च न्यायालय आणि सर्वोच्च न्यायालयाने या प्रकरणाची स्वत:हून दखल घेतली. डॉक्टरांच्या सुरक्षेसाठी राष्ट्रीय प्रोटोकॉल तयार करण्याचे निर्देशही सर्वोच्च न्यायालयाने दिले आहेत. सीबीआयने या प्रकरणी २५ सदस्यीय तपास पथक तयार केले आणि अनेक लोकांची चौकशी केली. आरोपी संजय रॉयवर खोटे तपासण्याची चाचणी आणि इतर वैज्ञानिक तपासण्या करण्यात आल्या. एजन्सीने १२५पानांचे आरोपपत्र दाखल केले, यामध्ये घटनेशी संबंधित प्रत्येक पैलू स्पष्ट करण्यात आला.
न्यायाधीश अनिर्बन दास यांनी भारतीय दंड संहितेच्या कलम ६४, ६६ आणि १०३ अंतर्गत संजय रॉयला दोषी ठरवले. न्यायालयाने अवघ्या ५७ दिवसांत या प्रकरणाची सुनावणी पूर्ण केली. आता संजय रॉयच्या शिक्षेची घोषणा २० जानेवारीला होणार आहे. सध्या त्याची न्यायालयीन कोठडीत रवानगी करण्यात आली आहे.
