चीनमधील वैज्ञानिकांनी अशा मॅग्लेव्ह ट्रेनची यशस्वी चाचणी केली आहे, जी दोन सेकंदात ७०० किलोमीटर प्रति तास वेगापर्यंत पोहोचली. ती इतकी वेगवान आहे की डोळ्यांनी तिला नीट पाहणेही कठीण होते.
या सुपरफास्ट ट्रेनची चाचणी चीनच्या नॅशनल युनिव्हर्सिटी ऑफ डिफेन्स टेक्नॉलॉजीच्या वैज्ञानिकांनी केली. सुमारे एक टन वजनाच्या या ट्रेनला ४०० मीटर लांब विशेष ट्रॅकवर चालवण्यात आले.
चाचणीदरम्यान ट्रेनने काही क्षणात विक्रमी वेग पकडला आणि नंतर तिला सुरक्षितपणे थांबवण्यातही आले. वैज्ञानिकांचे म्हणणे आहे की, ही आतापर्यंतची सर्वात वेगवान सुपरकंडक्टिंग इलेक्ट्रिक मॅग्लेव्ह ट्रेन आहे.
अभियंत्यांची टीम गेल्या दहा वर्षांपासून या प्रकल्पावर काम करत होती. याच वर्षी जानेवारीमध्ये याच ट्रॅकवर ट्रेनला ६४८ किलोमीटर प्रति तास वेगापर्यंत पोहोचवण्यात आले होते, पण आता ७०० किमी प्रति तास वेगाचा टप्पा ओलांडून नवा जागतिक विक्रम केला आहे.
चाचणीचा व्हिडिओ समोर आला आहे, ज्यात ट्रेन विजेच्या वेगाने ट्रॅकवर धावताना दिसते. मॅग्लेव्ह ट्रेनची खास गोष्ट अशी आहे की ती रुळांना स्पर्श करतच नाही.
यात लावलेले शक्तिशाली मॅग्नेट ट्रेनला हवेत उचलतात आणि पुढे ढकलतात. चाके आणि रुळांमध्ये कोणताही संपर्क नसल्यामुळे, घर्षण निर्माण होत नाही आणि ट्रेन खूप जास्त वेगाने धावू शकते.
शास्त्रज्ञांचे म्हणणे आहे की, ज्या ताकदीने ही ट्रेन पुढे सरकते, त्याच तंत्रज्ञानाचा वापर भविष्यात रॉकेट प्रक्षेपित करण्यासाठी देखील केला जाऊ शकतो. जर हे तंत्रज्ञान प्रवासी गाड्यांमध्ये वापरले गेले, तर मोठ्या शहरांमधील प्रवास काही मिनिटांत पूर्ण होऊ शकेल.
साउथ चायना मॉर्निंग पोस्टनुसार, या प्रकल्पात वैज्ञानिकांनी अनेक कठीण तांत्रिक समस्या सोडवल्या आहेत. यात अत्यंत वेगवान इलेक्ट्रोमॅग्नेटिक प्रणालीने ट्रेनला पुढे ढकलणे, हवेत स्थिर ठेवणे, अचानक मोठ्या प्रमाणात विजेची गरज हाताळणे आणि शक्तिशाली सुपरकंडक्टिंग मॅग्नेटचा वापर करणे यांचा समावेश आहे.
नॅशनल युनिव्हर्सिटी ऑफ डिफेन्स टेक्नॉलॉजीचे प्राध्यापक ली जी म्हणाले की, या अल्ट्रा हाय-स्पीड मॅग्लेव्ह प्रणालीच्या यशामुळे चीनमध्ये सुपरफास्ट ट्रेनवरील संशोधन आणि विकासाला नवी दिशा मिळेल आणि भविष्यात आणखी वेगवान ट्रेन बनवण्याचा मार्ग मोकळा होईल.
सुमारे ३० वर्षांपूर्वी याच विद्यापीठाने चीनची पहिली मॅग्लेव्ह ट्रेन बनवली होती, ज्यात लोक प्रवास करू शकत होते. यासोबतच चीन हे तंत्रज्ञान विकसित करणारा जगातील तिसरा देश बनला होता.
- ऋषभ एकावडे
