भारताने अडीच दिवसांत गमावली सिडनी कसोटी

सिडनी : सिडनी कसोटीत भारतीय संघ ऑस्ट्रेलियाविरुद्ध ६ गड्यांनी पराभूत झाला. या पराभवासह भारतीय संघाला बॉर्डर-गावस्कर करंडक स्पर्धेत ३-१ असा पराभव पत्करावा लागला आहे. या मालिकेत ऑस्ट्रेलियाने १० वर्षांनंतर भारताचा पराभव केला आहे. यापूर्वी कांगारू संघाने २०१४-१५ च्या मोसमात एमएस धोनीच्या नेतृत्वाखाली टीम इंडियाकडून मालिका जिंकली होती.
रविवारी, सामन्याच्या तिसऱ्या दिवशी भारताने ऑस्ट्रेलियाला १६२ धावांचे लक्ष्य दिले होते, जे ऑस्ट्रेलियन संघाने दुसऱ्या डावात ४ विकेट गमावून पूर्ण केले. ट्रॅव्हिस हेड ३४ आणि ब्यू वेबस्टर ३९ धावांवर नाबाद राहिले. या दोघांशिवाय उस्मान ख्वाजाने ४१ आणि सॅम कोन्स्टासने २२ धावा केल्या. भारताकडून प्रसिद्ध कृष्णाने ३ बळी घेतले. दिवसाच्या पहिल्या सत्रात भारतीय संघ दुसऱ्या डावात १५७ धावांवर आटोपला. स्कॉट बोलंडला सामनावीर तर जसप्रीत बुमराहला मालिकावीर पुरस्कार देण्यात आला.
तत्पूर्वी, ऑस्ट्रेलिया पहिल्या डावात १८१ धावांत सर्वबाद झाला होता, तर भारताने पहिल्या डावात १८५ धावा केल्या होत्या. अशाप्रकारे भारताला पहिल्या डावात ४ धावांची आघाडी मिळाली.
.गावस्कर यांना बोलावले नाही
ऑस्ट्रेलियाने सिडनी कसोटी जिंकल्यानंतर ॲलन बॉर्डर यांना ट्रॉफी देण्यासाठी बोलावले. मालिका जिंकणाऱ्या ऑस्ट्रेलियन संघाला त्यांनी ट्रॉफी दिली. तर, सुनील गावसकर १०० मीटर अंतरावर होते, पण त्यांना या कार्यक्रमासाठी बोलावण्यात आले नाही.यावर सुनील गावसकर म्हणाले, पुरस्कार वितरण समारंभाला गेल्यावर आनंद झाला असता. अखेर ही बॉर्डर गावस्कर ट्रॉफी आहे. जी ऑस्ट्रेलिया आणि भारताला जोडलेली आहे. मी स्वतः मैदानावर होतो. ही ट्रॉफी ऑस्ट्रेलियाला दिली जात होती याची मला पर्वा नाही. ते चांगले क्रिकेट खेळले आणि जिंकले. ठीक आहे. फक्त मी भारतीय आहे म्हणून. माझा चांगला मित्र ॲलन बॉर्डर याच्यासोबत ट्रॉफी सादर करताना मला आनंद झाला असता.
वाढता वाद बघून क्रिकेट ऑस्ट्रेलियाने आपली चूक मान्य केली आहे. यजमान मंडळाने रविवारी जारी केलेल्या निवेदनात म्हटले आहे, गावसकर यांना माहित होते की जर भारतीय संघाने सिडनी कसोटी जिंकली असती आणि ट्रॉफी कायम ठेवली असती तर त्यांनी हा पुरस्कार भारतीय कर्णधार जसप्रीत बुमराहला दिला असता. ॲलन बॉर्डर आणि सुनील गावस्कर दोघेही मंचावर असते तर बरे झाले असते, असे आम्हालाही​ वाटते, असे सांगून सारवासारव करण्याचा प्रयत्न करण्यात आला.
भारताच्या पराभवाची ५ कारणे
फलंदाजी क्रम पुन्हा फ्लॉप
टीम इंडियाची बॅटिंग ऑर्डर पुन्हा एकदा अपयशी ठरली. दोन्ही डावात ऋषभ पंत सर्वाधिक धावा करणारा ठरला, त्याच्याशिवाय एकाही फलंदाजाला ३० धावाही करता आल्या नाहीत. यशस्वी, राहुल, शुभमन आणि विराट या चारही खेळाडूंना चांगल्या सुरुवातीचे मोठ्या डावात रूपांतर करता आले नाही.
पंत चांगला खेळला पण त्याला साथ मिळाली नाही
पहिल्या डावात चांगली गोलंदाजी केल्यानंतर भारताने ४ धावांची आघाडी घेतली. पंतने दुसऱ्या डावात ६१ धावा केल्या, त्याच्याशिवाय इतर फलंदाज काही विशेष करू शकले नाहीत. पंत बाद झाला तेव्हा भारताची धावसंख्या ५ गडी बाद १२४ होती. यानंतर पुढील ५ फलंदाज ३३ धावांत बाद झाले. ऑस्ट्रेलियाला १६२ धावांचे माफक लक्ष्य मिळाले.
बुमराहची दुखापत टर्निंग पॉइंट
दुसऱ्या दिवशी पहिल्या डावात गोलंदाजी करताना जसप्रीत बुमराहला दुखापत झाली. तो स्कॅनसाठी गेला, जिथे त्याने बॅक स्पास्मची तक्रार केली. दुसऱ्या डावात त्याला गोलंदाजी करता आली नाही, त्यामुळे संघ कांगारू फलंदाजांवर दबाव टाकू शकला नाही. बुमराह तंदुरुस्त राहिला असता तर ऑस्ट्रेलियाला लक्ष्याचा पाठलाग करणे फार कठीण गेले असते. पहिल्या डावात बुमराहने उस्मान ख्वाजा आणि मार्नस लॅबुशेनचे महत्त्वाचे बळी घेतले.
गोलंदाजांना चांगल्या खेळपट्टीचा फायदा घेता आला नाही
बुमराहला दुखापत झाली असली तरी त्याच्याशिवाय संघाने पहिल्या डावात ऑस्ट्रेलियाला सर्वबाद केले होते. सिडनीची खेळपट्टी फलंदाजांसाठी आव्हानात्मक होती, तरीही भारतीय गोलंदाज दुसऱ्या डावात कांगारूंच्या फलंदाजांना रोखू शकले नाहीत.खेळपट्टीवर ७ मिमी गवत सोडले होते, त्यामुळे पहिल्या दिवसापासून फलंदाजांना अडचणी निर्माण होत होत्या.तिसऱ्या दिवशी भेगा पडल्या होत्या, त्यामुळे चेंडूला उसळी मिळत होती आणि चेंडूला स्विंगही होत होते. मात्र याचा फायदा भारतीय गोलंदाजांना घेता आला नाही.भारतासाठी प्रसिद्ध कृष्णाने दुसऱ्या डावात सर्वाधिक ३ बळी घेतले.
शेवटच्या कसोटीतही विराट अपयशी
विराट कोहली ऑस्ट्रेलिया दौऱ्यावर आला तेव्हा त्याच्या फॉर्ममध्ये पुनरागमनाच्या अपेक्षा होत्या. पर्थ कसोटीतही शतक झळकावून त्याने आपला फॉर्म परत मिळवला, मात्र उर्वरित ४ कसोटीत त्याला विशेष काही करता आले नाही. सिडनीमध्ये तो १७ आणि ६ धावाच करू शकला. या दौऱ्यात तो ९ पैकी ८ डावात ऑफ स्टंपच्या बाहेर जाणाऱ्या चेंडूवर बाद झाला होता. कोहलीसारख्या महान फलंदाजाची कामगिरी न करणे हेही भारताच्या पराभवाचे प्रमुख कारण ठरले.

भारत डब्ल्यूटीसीच्या अंतिम शर्यतीतून बाहेर

या पराभवानंतर, भारतीय संघ (५० टक्के) जागतिक कसोटी चॅम्पियनशिपच्या  अंतिम फेरीच्या शर्यतीतून बाहेर पडला आहे, तर ऑस्ट्रेलियाने (६३.७३ टक्के) सलग दुसऱ्यांदा अंतिम फेरीत प्रवेश केला आहे.

पॅट कमिन्सचा विश्वविक्रम
पॅट कमिन्स या मालिकेत बुमराहनंतर सर्वाधिक विकेट घेणारा दुसरा गोलंदाज ठरला. कमिन्सने या मालिकेत २५ विकेट घेतले. पॅट कमिन्सने सिडनी कसोटीत ३ विकेट्स घेत मोठा विक्रम केला. पॅट कमिन्सने भारताच्या दुसऱ्या डावात ऋषभ पंत, रवींद्र जडेजा आणि वॉशिंग्टन सुंदर यांना बाद केले आणि अशा प्रकारे डब्ल्यूटीसीच्या इतिहासात त्याच्या २०० विकेट्स पूर्ण झाल्या. डब्ल्यूटीसीच्या इतिहासात २०० विकेट घेणारा तो जगातील पहिला गोलंदाज ठरला आहे. कमिन्सने ४७व्या कसोटी सामन्यातील ८८ डावांमध्ये हा मोठा टप्पा गाठला. जागतिक कसोटी चॅम्पियनशिपच्या इतिहासात नॅथन लायन हा दुसऱ्या क्रमांकाचा सर्वाधिक विकेट घेणारा गोलंदाज आहे आणि तो पुढील महिन्यात होणाऱ्या श्रीलंका दौऱ्यावर २०० विकेट्सचा टप्पा गाठू शकतो.