संशयिताकडून ३ लाखांच्या वस्तू जप्त : कळंगुट पोलिसांची कारवाई
कळंगुट पोलिसांनी संशयित डी.एम. संतोषाकडून जप्त केलेल्या चोरीच्या वस्तू.
म्हापसा : गौरावाडा-कळंगुट येथे ऑस्ट्रेलियन पर्यटक उतरलेल्या एका व्हिलामध्ये झालेल्या घरफोडी प्रकरणी पोलिसांकडून डी.एम. संतोषा (२७, शिमोगा-कर्नाटक) या सराईत चोरट्यास अटक केली. संशयिताकडून चोरीतील ३ लाखांच्या वस्तू जप्त केल्या.
ही चोरीची घटना गेल्या दि. १६ नोव्हेंबर रोजी घडली होती. या प्रकरणी अॅश्ली बॅकमन या ऑस्ट्रेलियन नागरिक पर्यटकाने कळंगुट पोलिसांत तक्रार गुदरली होती. फिर्यादींचे कुटुंब मध्यरात्री व्हिलामध्ये नसल्याची संधी साधून संशयित आरोपीने आत प्रवेश केला. आतील ३ लॅपटॉप, एक घडियावर व २५ हजार देशी विदेशी चलन असा एकूण ३.२५ लाखांचा मुद्देमाल लंपास केला होता. कासा दास इम्रास या व्हिलाच्या आवारातील सीसीटीव्हीमध्ये संशयित आरोपीचा चेहरा बंदिस्त झाला होता.
पोलीस चौकशीत संशयित आरोपी चोरी केल्यानंतर आपल्या मूळ गावी पसार झाल्याची माहिती पोलिसांना मिळाली होती. त्यानुसार पोलीस पथकाने शिमोगा-कर्नाटक येथे जाऊन संशयिताच्या मुसक्या आवळल्या व गोव्यात आणून त्यास रितसर अटक केली. पोलीस निरीक्षक परेश नाईक यांच्या मार्गदर्शनाखाली उपनिरीक्षक योगेश मांद्रेकर, राजाराम बागकर, हवालदार सतीश सावंत, विद्यानंद आमोणकर, कॉन्सटेबल विजय नाईक, भगवान पालयेकर, राजा परब, आदर्श नागेकर, गौरव चोडणकर व प्रणय गावस या पथकाने ही कामगिरी केली. दरम्यान, संशयित आरोपी हा सराईत चोरटा असून देशातील विविध भागांत त्याने चोऱ्या केल्या आहेत.
