आशियाई चॅम्पियन्स ट्रॉफीच्या जेतेपदासाठी चीन संघासोबत भिडणार
मोकी : आशियाई चॅम्पियन्स ट्रॉफी २०२४ च्या उपांत्य फेरीत भारतीय हॉकी संघाने दक्षिण कोरियाचा पराभव केला. टीम इंडियाच्या खेळाडूंनी सोमवारी (१६सप्टेंबर) धमाकेदार खेळ करत कोरियन संघाचा धुव्वा उडवला. भारताने हा सामना ४-१ ने जिंकला. आता अंतिम फेरीत भारताचा सामना चीनशी होणार आहे. उपांत्य फेरीत चीनने पाकिस्तानचा पराभव केला होता.
भारतीय संघाच्या खेळाडूंनी पहिल्या क्वार्टरमध्येच आक्रमक खेळ दाखवत गोल करण्याच्या अनेक संधी निर्माण केल्या. याचा फायदा घेत पहिल्या क्वार्टरमध्ये उत्तम सिंगने उत्कृष्ट गोल केला आणि सामन्यात भारताला १-० अशी आघाडी मिळवून दिली.
भारताने गोल करण्याचे प्रयत्न सुरूच ठेवले आणि १९व्या मिनिटाला पेनल्टी कॉर्नरच्या रूपात त्याचे फळ मिळाले. त्यानंतर कर्णधार हरमनप्रीत सिंगने भारतीय संघासाठी दुसरा गोल केला. यानंतर कोरियन संघाने गोल करण्याचा प्रयत्न केला, पण त्यांना यश आले नाही.
हाफ टाइमपर्यंत टीम इंडियाकडे २-० अशी आघाडी होती. यानंतर जर्मनप्रीत सिंगने तिसरा गोल केला. त्याने कोरियन गोलकीपर किमला अजिबात हालचाल करण्यास वेळ दिला नाही. भारतीय संघाने सामन्यावर आपली पकड प्रस्थापित केली होती. त्यानंतर कोरियाच्या यांग जी-हुनने उत्कृष्ट गोल नोंदवून आपल्या संघात पुनरागमन करण्याचा प्रयत्न केला. या सामन्यात कोरियासाठी गोल करणारा तो एकमेव खेळाडू होता. पाकिस्तानचा लाजिरवाणा पराभव
भारताकडून झालेल्या दारूण पराभवानंतर पाकिस्तान संघाला आणखी एक मोठा धक्का बसला आहे. आशियाई चॅम्पियन्स ट्रॉफीच्या उपांत्य फेरीत पाकिस्तान संघाचा पराभव झाला. उपांत्य फेरीत चीनने पाकिस्तानचा पेनल्टी शूटआऊटमध्ये पराभव करत प्रथमच अंतिम फेरीत धडक मारली. दोन्ही संघांमध्ये ६० मिनिटे चुरशीची स्पर्धा होती. पण निर्धारित वेळ संपेपर्यंत दोन्ही संघ १-१ गोल करू शकले आणि त्यानंतर सामना पेनल्टी शूटआऊटमध्ये गेला जिथे पाकिस्तानने खराब खेळाच्या सर्व मर्यादा मोडल्या. निर्धारित वेळेत पाकिस्तानकडून नदीम अहमदने, तर चीनकडून लू युआनलिन यांनी गोल केले होते. पेनल्टी शूटआऊटमध्ये पाकिस्तान संघाला एकही गोल करता आला नाही आणि चीनने पाकिस्तानच्या गोलपोस्टमध्ये दोनदा भेदक मारा केला. चीनच्या संघाने पहिला शॉट घेतला आणि पाकिस्तानने शूटआऊटसाठी आपला गोलकीपर बदलला. संघाने मुनीब उर रहमानला गोलरक्षक बनवले पण असे असतानाही चीनने दोनदा चेंडू गोलपोस्टमध्ये पाठवला. आता पाकिस्तानचा संघ अंतिम फेरीच्या शर्यतीतून बाहेर पडला असून त्यांना तिसऱ्या स्थानासाठी सामना खेळावा लागणार आहे.
भारत सहाव्यांदा फायनलमध्ये
टीम इंडियासाठी कर्णधार हरमनप्रीत सिंगने चौथा गोल केला. त्याचा हा सामन्यातील एकूण दुसरा गोल ठरला. त्याने भारताला ४-१ ने पुढे केले. ही गोलसंख्या सामना संपेपर्यंत कायम राहिली. या सामन्यात भारताकडून हरमनप्रीत सिंग, उत्तम सिंग आणि जर्मनप्रीत सिंग यांनी गोल केले. भारताने सहाव्यांदा आशियाई चॅम्पियन्स ट्रॉफीच्या अंतिम फेरीत प्रवेश केला आहे. फायनलमध्ये भारताचा सामना चीनशी होणार आहे. चीनने पहिल्यांदाच फायनलमध्ये प्रवेश केला आहे.
