संदीप घोष यांच्यावर आरजी कार कॉलेज आणि हॉस्पिटलमध्ये आर्थिक अनियमितता केल्याचा आरोप आहे. ईडी आणि सीबीआय या दोन्ही एजन्सी तपास करत आहेत. याच अनुषंगाने १३ दिवसांपूर्वी सीबीआयने देखील त्यांच्या घरी छापेमारी केली होती.
कोलकाता : आरजी कार मेडिकल कॉलेजचे माजी प्राचार्य संदीप घोष यांच्यावर आर्थिक अनियमिततेचा आरोप आहे. अंमलबजावणी संचालनालयाने (ईडी) पीएमएलए अंतर्गत मनी लाँड्रिंगचा गुन्हा दाखल केला आहे. आज शुक्रवारी ईडीने ६ ठिकाणी छापे टाकले. यामध्ये घोष यांच्या बेलीघाटातील घराचाही समावेश आहे. याशिवाय ईडी हावडा आणि सुभाषग्राममधील इतर दोन ठिकाणीही तपास करत आहे.
दुसरीकडे सीबीआयही या प्रकरणाचा तपास करत आहे. १३ ऑगस्ट रोजी कलकत्ता उच्च न्यायालयाने आरजी कार बलात्कार-हत्या प्रकरणाचा तपास आणि रुग्णालयातील आर्थिक अनियमितता सीबीआयकडे सोपवली होती. सीबीआय तपासाविरोधात घोष यांच्या याचिकेवर आज सर्वोच्च न्यायालयात सुनावणी होणार आहे. सीबीआयने घोष यांना २ सप्टेंबर रोजी अटक केली होती. तो आठ दिवसांच्या सीबीआय कोठडीत आहे. पश्चिम बंगालच्या आरोग्य विभागाने घोष यांना निलंबित केले आहे. यापूर्वी २८ ऑगस्ट रोजी इंडियन मेडिकल असोसिएशनने (IMA) संदीप घोष यांचे सदस्यत्व रद्द केले होते.
घटनेच्या दुसऱ्याच दिवशी संदीप घोष यांनी प्रशिक्षणार्थी डॉक्टरच्या बलात्कार-हत्येच्या दुसऱ्याच दिवशी बाजूच्या खोल्यांच्या नूतनीकरणाचे आदेश दिल्याचे सीबीआयच्या तपासात समोर आले आहे. प्रशिक्षणार्थी डॉक्टरचा मृतदेह ९ ऑगस्ट रोजी सकाळी सेमिनार हॉलमध्ये आढळून आला.
मिळालेल्या माहितीनुसार, सीबीआयच्या हाती महत्त्वाची कागदपत्रे लागली आहेत. संदीप घोष यांनी १० ऑगस्ट रोजी राज्य सार्वजनिक बांधकाम विभागाला (पीडब्ल्यूडी) सेमिनार हॉलच्या शेजारी असलेल्या खोलीचे आणि शौचालयाचे नूतनीकरण करण्यास सांगितले होते. या परवानगी पत्रावर घोष यांची स्वाक्षरीही आहे. आता हेच हे पत्र बलात्कार-हत्या प्रकरण आणि आर्थिक अनियमितता यांच्यातील दुवा बनू शकते, असे तपास अधिकाऱ्यांचे म्हणणे आहे. घोष यांना हे काम करण्याची घाई होती, त्यामुळे हा दस्तावेज बलात्कार-हत्या प्रकरणाशी संबंधित आहे. आणि याद्वारे आरजी कार कॉलेजमधील अन्य आर्थिक अनियमिततेच्या प्रकरणांमधील दुवे जोडण्यात मदत होऊ शकते.
१३ ऑगस्टच्या संध्याकाळी कलकत्ता उच्च न्यायालयाच्या खंडपीठाने हे प्रकरण सीबीआयकडे सोपवल्यानंतर नूतनीकरणाचे काम काही तासांनी बंद करण्यात आले.