१८३ धावांचा पाठलाग करताना लखनऊ १०१ धावांत गारद : मढवालचे ५ बळी
न्यूज डेस्क । गोवन वार्ता
चेन्नई : मुंबई इंडियन्स टीमने लखनऊ सुपर जायंट्स संघावर ८१ धावांनी दणदणीत विजय मिळवला. मुंबई इंडियन्सने लखनऊ सुपर जायंट्सला विजयासाठी १८३ धावांचे आव्हान दिले होते; मात्र मुंबईच्या भेदक माऱ्यासमोर आणि क्षेत्ररक्षणासमोर लखनऊचा डाव १६.३ षटकांतच १०१ धावांत आटोपला.
लखनऊला सर्वबाद फक्त १०१ धावाच करता आल्या. आकाश मढवाल मुंबईच्या विजयाचा शिल्पकार ठरला. मढवालने निर्णायक क्षणी लखनऊनला झटके दिले. मढवालने एकूण ५ बळी टिपले. मुंबईने शानदार क्षेत्ररक्षण करून लखनऊच्या तीन फलंदाजांना धावबाद केले. लखनऊचे स्पर्धेतील आव्हान संपुष्टात आले असून या विजयासह मुंबईने क्वालिफायर २ मध्ये प्रवेश केला आहे. २६ मे रोजी मुंबई आणि गुजरात यांच्यामध्ये अहमदाबाद येथील नरेंद्र मोदी स्टेडियमवर हा सामना होणार आहे. गुजरात आणि मुंबई यांच्यातील विजेता संघ २८ मे रोजी अंतिम सामन्यात चेन्नईसोबत भिडणार आहे.
चेपॉकची खेळपट्टी दुसऱ्या डावात संथ होते. त्यात दव पडण्याची शक्यता नाही. त्यामुळे नाणेफेक जिंकल्यानंतर मुंबईचा कर्णधार रोहित शर्माने प्रथम फलंदाजी करण्याचा निर्णय घेतला. सलामीच्या जोडीला अपेक्षेप्रमाणे प्रदर्शन करता आले नाही. नवीन उल हक आणि यश ठाकूर यांच्या भेदक गोलंदाजीसमोर मुंबईची फलंदाजी ढेपाळली. मुंबईने निर्धारित २० षटकांत आठ विकेटच्या मोबदल्यात १८२ धावांपर्यंत मजल मारली. मुंबईकडून कॅमरून ग्रीनने सर्वाधिक ४१ धावांची खेळी केली. त्याशिवाय सूर्यकुमार यादवनेही ३३ धावांचे योगदान दिले. नवीन उल हक आणि यश ठाकूर या जोडीने मुंबईच्या ७ फलंदाजांना तंबूचा रस्ता दाखवला.
मुंबईचे सलामीवीर पुन्हा अपयशी
मुंबईचा कर्णधार रोहित शर्माने नाणेफेक जिंकून प्रथम फलंदाजी करण्याचा निर्णय घेतला. इशान किशन आणि रोहित शर्मा यांची जोडी पुन्हा एकदा अपयशी ठरली. रोहित शर्मा अवघ्या ११ धावांवर बाद झाला, तर इशान किशन १५ धावांवर तंबूत परतला. रोहित शर्माने एक चौकार आणि एक षटकार लगावला, तर इशान किशनने तीन चौकार लगावले. दोन विकेट झटपट गेल्यानंतर सूर्यकुमार यादव आणि कॅमरून ग्रीन यांनी डाव सावरण्याचा प्रयत्न केला.
सूर्यकुमार आणि ग्रीन यांनी मुंबईची धावसंख्या झटपट वाढवली. दोघांनी मुंबईच्या डावाला आकार दिला. तिसऱ्या विकेटसाठी अर्धशतकी भागिदारी केली; पण नवीन उल हकने ही जोडी फोडली. सूर्यकुमार यादवला ३३ धावांवर तंबूत धाडले. त्यानंतर कॅमरून ग्रीनलाही त्याच षटकात बाद करत मुंबईला बॅकफूटवर ढकलले. कॅमरून ग्रीन याने २३ चेंडूत ४१ धावांची खेळी केली. सूर्यकुमार यादवने २० चेंडूत ३३ धावांची खेळी केली. यामध्ये सूर्यकुमार यादवने दोन षटकार आणि दोन चौकार लगावले. कॅमरून ग्रीनने सहा चौकार आणि एक षटकार ठोकला.
वढेराच्या खेळीमुळे मुंबईची समाधानकारक धावसंख्या
दोन विकेट झटपट गेल्यानंतर तिलक वर्माने टीम डेविडच्या मदतीने मुंबईची धावसंख्या हालती ठेवली. पण यश ठाकूरने डेविडला तंबूचा रस्ता दाखवला. डेविड फक्त १३ धावांवर बाद झाला. त्यानंतर तिलक वर्माही बाद झाला. तिलक वर्माने दोन षटकारांच्या मदतीने २६ धावांचे योगदान दिले. अखेरीस नेहल वढेराने झटपट खेळी करत मुंबईला सन्मानजक धावसंख्येपर्यंत पोहोचवले. नेहल वढेराने १२ चेंडूत दोन चौकार आणि दोन षटकारांच्या मदतीने २३ धावांची खेळी केली.
लखनऊचीही सुरुवात निराशाजनक
आकाश मढवालच्या भेदक माऱ्यापुढे लखनऊच्या संघाची दाणादाण उडाली. मुंबईने दिलेल्या १८३ धावांच्या आव्हानाचा पाठलाग करताना लखनऊचा संघ १६.३ षटकांत १०१ धावांत गारद झाला. लखनऊकडून मार्कस स्टॉयनिसने एकाकी झुंज दिली. स्टॉयनिसने ४० धावांची खेळी केली. मुंबईकडून आकाश मढवालने लखनऊचा निम्मा संघ तंबूत धाडला.
मुंबईच्या गोलंदाजांनी सुरुवातीपासून लखनऊच्या फलंदाजांवर वर्चस्व ठेवले. डावाच्या दुसऱ्याच षटकांत सलामीची जोडी फोडण्यात मुंबईला यश मिळाले. प्रेरक मंकड ६ चेंडूत ३ धावा करून आकाश मढवालचा बळी ठरला. त्याचा झेल हृतिक शोकिनने टिपला. त्यानंतर पुढच्याच षटकात कायल मेयर्स (१८) तंबूत परतला. त्याला जॉर्डनने ग्रीनकरवी झेलबाद केले. त्यानंतर फक्त स्टॉयनिसनेच एकाकी झुंज देण्याचा प्रयत्न केला. समोरून एकापाठोपाठ एक फलंदाज बाद होत होते. तरीदेखील स्टॉयनिस किल्ला लढवत होता. त्याने २७ चेंडूत ५ चौकार आणि एका षटकाराच्या मदतीने ४० धावा फटकावल्या. तो बाराव्या षटकात धावचित झाला. या डावात केवळ तीनच फलंदाजांनी दुहेरी संख्या गाठली. मुंबईच्या खेळाडूंनी उत्तम क्षेत्ररक्षण केले. लखनऊच्या तीन फलंदाजांना त्यांनी अचूक थ्रोद्वारे धावचित केले.
