केपटाऊन कसोटी सामन्यात टीम इंडियाचा डाव कोसळला

|
11th January 2022, 11:41 Hrs
केपटाऊन कसोटी सामन्यात टीम इंडियाचा डाव कोसळला

केपटाऊन : येथे खेळवण्यात येत असलेल्या तिसऱ्या व अंतिम कसोटी सामन्याच्या पहिल्याच दिवशी भारताचा संपूर्ण डाव २२३ धावांत आटोपला. भारतातर्फे विराट कोहलीने सर्वाधिक ७९ धावा केल्या. पहिल्या दिवसाचा खेळ संपेपर्यंत दक्षिण आफ्रिकेने आपल्या पहिल्या डावात एक गडी गमावून १७ धावा केल्या होत्या.

 पुन्हा एकदा दक्षिण आफ्रिकेच्या अननुभवी गोलंदाजांसमोर भारतीय संघाला ३०० धावाही करता आल्या नाहीत. पहिल्या डावात टीम इंडिया अवघ्या २२३ धावांवर आटोपली. भारतीय कर्णधार विराट कोहलीने अर्धशतक ठोकले पण इतर फलंदाज फ्लॉप ठरले. विराट कोहलीने ७९ धावांची खेळी खेळली. यानंतर पुजाराने ४३ धावा केल्या, तर पंतने २७ धावांची खेळी केली.      

दक्षिण आफ्रिकेकडून कागिसो रबाडा आणि मार्को यान्सन यांनी चांगली गोलंदाजी केली. रबाडाने ४ आणि यान्सनने ३ बळी घेतले. ऑलिव्हियर, लुंगी एन्गिडी आणि केशव महाराज यांनी १-१ विकेट घेतली. भारतीय संघाने या मालिकेत फक्त एकदाच ३०० चा टप्पा गाठला आहे आणि गेल्या ४ डावांत ३०० चा टप्पा गाठलेला नाही. याचे कारण म्हणजे भारतीय मधल्या फळीची खराब कामगिरी आणि या मालिकेतील दुसरा सलामीवीर मयंक अग्रवालही फ्लॉप ठरला आहे.      

भारताची सलामी अपयशी      

केपटाऊन कसोटीत कर्णधार कोहलीने नाणेफेक जिंकून प्रथम फलंदाजीचा निर्णय घेतला. केएल राहुल आणि मयंक अग्रवाल यांच्याकडून चांगली सुरुवात अपेक्षित होती. दोघांनी येताच काही दृश्यमान स्ट्रोक खेळले पण डुआन ऑलिव्हियरने केएल राहुलला १२ धावांवर बाद करून दक्षिण आफ्रिकेला पहिले यश मिळवून दिले.       

पुढच्याच षटकात रबाडाने आक्रमण करत मयंक अग्रवालची विकेट घेतली. यानंतर पुजारा आणि कर्णधार कोहलीने उपाहारापर्यंत भारतीय डावाची धुरा सांभाळली. दोघांनी १५३ चेंडूत ६२ धावा जोडल्या. उपाहारापर्यंत भारतीय संघाला २ बाद ७५ धावा करता आल्या होत्या मात्र त्यानंतर दक्षिण आफ्रिकेने प्रत्युत्तर दिले.      

मार्को यान्सनने पुजाराला ४३ धावांवर बाद केले आणि काही वेळाने रहाणेने रबाडाच्या हाती विकेट दिली. मात्र, कोहलीने टिकून राहून पंतसोबत आणखी एक अर्धशतकी भागिदारी केली. दोघांनी ११३ चेंडूत ५१ धावा जोडल्या. पंत चांगली फलंदाजी करत होता पण यान्सनच्या एका चांगल्या चेंडूवर त्याने विकेट गमावली. मात्र, ही जोडी तुटण्यापूर्वी विराट कोहलीने कसोटीतील २८वे अर्धशतक पूर्ण केले.       

यानंतर अश्विन ८ धावा करून बाद झाला. शार्दुल ठाकूरसह विराटने ३० चेंडूत ३० धावा जोडल्या. शार्दुलही लवकर बाद झाला आणि बुमराहलाही उभे राहता आले नाही. सुरुवातीला धावा काढण्याच्या नादात विराट कोहलीने ७९ धावांवर आपली विकेट गमावली. अखेरीस भारतीय संघाला २२३ धावाच करता आल्या.