कोलकाता नाईट रायडर्सविरुद्ध १ धावेने पराभूत : श्रेयसची अर्धशतकी खेळी
कोलकाता : कोलकाता नाईट रायडर्सने रॉयल चॅलेंजर्स बंगळुरूचा १ धावाने पराभव केला. केकेआरने प्रथम खेळताना २२२ धावांची मोठी धावसंख्या उभारली होती. मात्र रोमहर्षक सामन्यात बंगळुरूला केवळ एका धावेने पराभवाचा सामना करावा लागला.
लक्ष्याचा पाठलाग करताना आरसीबीला सुरुवात चांगली झाली नाही. विराट कोहली आणि फाफ डू प्लेसिस चौथ्याच षटकातच पॅव्हेलियनमध्ये परतले होते. एकीकडे विराटने १८ धावा केल्या तर डू प्लेसिसने केवळ ७ धावा केल्या.
दरम्यान, तिसऱ्या विकेटसाठी विल जॅक आणि रजत पाटीदार यांच्यातील १०२ धावांच्या धडाकेबाज भागीदारीने आरसीबीला सामन्यात परत आणले. बंगळुरूसाठी विल जॅकने ३२ चेंडूंत ५५ धावा केल्या, ज्यात त्याने ४ चौकार आणि ५ षटकार मारले. त्याच्याशिवाय पाटीदारने शानदार फलंदाजी करत २३ चेंडूंत ५२ धावांची खेळी केली. दरम्यान, सुनील नरेनने १३व्या षटकात २ बळी घेत सामन्याची दिशाच बदलून टाकली होता.
११ षटकांनंतर आरसीबीची धावसंख्या २ बाद १३७ धावा होती. पण पुढच्या २ षटकांत बंगळुरूने ४ महत्त्वाच्या विकेट गमावल्या, त्यामुळे सामना पूर्णपणे गडबडला. १३व्या षटकानंतर संघ ६ विकेट गमावून १५५ धावांवर खेळत होता. अशा परिस्थितीत प्रभावशाली खेळाडू म्हणून आलेल्या दिनेश कार्तिक आणि सुयश प्रभुदेसाई यांनी जबाबदारी स्वीकारली.
डावाचा दुसरा टाईम-आऊट १६व्या षटकानंतर झाला, तोपर्यंत आरसीबीची धावसंख्या ६ गडी बाद १८१ धावा होती. त्यांना २४ चेंडूत विजयासाठी ४२ धावांची गरज होती. शेवटच्या २ षटकांत आरसीबीला विजयासाठी ३१ धावांची गरज होती, परंतु १९व्या षटकात कार्तिक बाद झाल्यामुळे बंगळुरूच्या विजयाची शक्यता जवळपास संपुष्टात आली होती. शेवटच्या षटकात २१ धावांची गरज होती. कर्ण शर्माने मिचेल स्टार्कच्या षटकात ३ षटकार मारून सामना रोमांचक बनवला होता, मात्र ५व्या चेंडूवर मिचेल स्टार्कने कर्ण शर्माला झेलबाद करून सामना कोलकाताच्या बाजूने परत आणला. शेवटच्या चेंडूवर लॉकी फर्ग्युसन धावबाद झाला, त्यामुळे आरसीबीला १ धावेने पराभवाचा सामना करावा लागला.
कोलकाताची फलंदाजी
तत्पूर्वी, रॉयल चॅलेंजर्स बंगळुरूचा कर्णधार फाफ डू प्लेसिसने नाणेफेक जिंकून गोलंदाजी करण्याचा निर्णय घेतला. प्रथम फलंदाजी करण्यासाठी आलेल्या कोलकाता नाईट रायडर्सची सुरुवात चांगली झाली. सलामीवीर फिल सॉल्ट आणि सुनील नरेन यांनी ४.२ षटकांत ५६ धावा जोडल्या. १४ चेंडूत ४८ धावांची तुफानी इनिंग खेळून फिल सॉल्ट मोहम्मद सिराजचा बळी ठरला. यानंतर विकेट पडण्याची प्रक्रिया सुरू झाली. १५ चेंडूत १० धावा करून सुनील नरेनला यश दयालने बाद केले. अंगकृश रघुवंशी ४ चेंडूत ३ धावा करून पॅव्हेलियनमध्ये गेला. व्यंकटेश अय्यरने ८ चेंडूत १६ धावांचे योगदान दिले. काही वेळातच केकेआरचे ४ फलंदाज ९७ धावा करून पॅव्हेलियनमध्ये परतले होते.
यानंतर कर्णधार श्रेयस अय्यर आणि रिंकू सिंगने डाव सांभाळण्याचा प्रयत्न केला. पण रिंकू सिंगने १६ चेंडूंत २४ धावा केल्या. कोलकाता नाईट रायडर्सला १३७ धावांवर पाचवा धक्का बसला. श्रेयस अय्यरने एक बाजू घट्ट पकडली असली तरी दुसऱ्या बाजूने फलंदाज ठराविक अंतराने पॅव्हेलियनमध्ये परतत राहिले. श्रेयस अय्यरने ३६ चेंडूत ५० धावा केल्या आणि कॅमेरून ग्रीनच्या गोलंदाजीवर तो बाद झाला.
मात्र, अखेरच्या षटकांमध्ये रमणदीप सिंग आणि आंद्रे रसेल यांनी स्फोटक फलंदाजीचे प्रदर्शन केले. दोन्ही फलंदाजांनी शेवटच्या १६ चेंडूंत ४३ धावा जोडल्या. रमणदीप सिंगने ९ चेंडूत २४ धावा केल्या. तर आंद्रे रसेल २० चेंडूत २७ धावा करून नाबाद परतला.
