गुवाहाटी : नार्कोटिक्स कंट्रोल ब्युरोच्या (एनसीबी) (The Narcotics Control Bureau (NCB) गुवाहाटी विभागीय पथकाने आंतरराष्ट्रीय अमली पदार्थ नेटवर्कचा पर्दाफाश केला. मोठी कारवाई करत सुमारे ४३ कोटी रुपये बाजारमूल्य असलेले ५३ किलोहून अधिक अमली पदार्थ जप्त केले आहेत. या कारवाईत दोन अमली पदार्थ तस्करांना अटक करण्यात आली. जप्त केलेल्या साठ्यात मेथाम्फेटामाइन आणि ‘डब्ल्यूवाय’ (WY) गोळ्यांचा समावेश असून, हा माल म्यानमारमधून तस्करीद्वारे आणण्यात आल्याची माहिती एनसीबीने दिली. (NCB busts international drug network; two arrested in Guwahati with contraband worth ₹43 crore.)
या प्रकरणाचा पुढील तपास सुरू असून, अमली पदार्थांचा आंतरराष्ट्रीय पुरवठा करणारे सूत्रधार, देशांतर्गत साठा स्वीकारणारे आणि तस्करीच्या जाळ्यातील इतर सदस्यांचा शोध घेतला जात आहे. या कारवाईमुळे सीमापार अमली पदार्थ तस्करीचे संघटित स्वरूप पुन्हा एकदा समोर आले आहे.
अमली पदार्थांच्या तस्करीला आळा घालण्यासाठी विविध केंद्रीय आणि राज्यस्तरीय यंत्रणांमधील समन्वय अधिक मजबूत करण्यात येत असल्याचे एनसीबीने स्पष्ट केले. राज्य पोलीस दल, अमली पदार्थविरोधी कृती दल, आसाम रायफल्स, सीमा सुरक्षा दल (बीएसएफ), केंद्रीय राखीव पोलीस दल (सीआरपीएफ), सशस्त्र सीमा बल (एसएसबी), सीमाशुल्क विभाग, महसूल गुप्तचर संचालनालय, राष्ट्रीय तपास संस्था आणि अंमलबजावणी संचालनालय यांच्यासोबत माहितीची देवाणघेवाण व संयुक्त कारवायांवर भर दिला जात आहे.
‘नशामुक्त भारत’ अभियान अधिक तीव्र
‘नशामुक्त भारत’ अभियानांतर्गत अमली पदार्थांच्या संपूर्ण पुरवठा साखळीचा मागोवा घेणे, तस्करीतून होणाऱ्या आर्थिक व्यवहारांचा तपास करणे आणि संघटित तस्करी टोळ्यांचे जाळे उद्ध्वस्त करणे, हे उद्दिष्ट असल्याचे एनसीबीने सांगितले. या कारवाईमुळे अमली पदार्थांच्या अवैध व्यापाराविरोधातील मोहिमेला बळ मिळाले आहे.