पणजी : कदंब वाहतूक महामंडळाने स्मार्ट ट्रान्झिट कार्डाचा वापर करून प्रवास करणाऱ्या प्रवाशांना मिळणारी सवलत सध्याच्या १० टक्क्यांवरून थेट २० टक्क्यांपर्यंत वाढवण्याचा महत्त्वपूर्ण निर्णय घेतला आहे. ही वाढीव सूट १ नोव्हेंबरपासून लागू होणार असून, महामंडळाच्या वर्धापन दिन सोहळ्यात मुख्यमंत्री डॉ. प्रमोद सावंत यांनी ही घोषणा केली होती. सार्वजनिक वाहतूक व्यवस्थेचा वापर वाढवणे आणि नियमित प्रवाशांना अधिक आर्थिक दिलासा देणे, हा या निर्णयाचा मुख्य उद्देश आहे.
या नवीन सवलतीनुसार, कदंबच्या बसमधून प्रवास करताना स्मार्ट ट्रान्झिट कार्ड वापरणाऱ्या प्रवाशांना प्रत्येक व्यवहारावर २० टक्के सूट मिळेल. त्यामुळे प्रवाशांच्या प्रवासावरील खर्चात बचत होऊन त्यांना अतिरिक्त आर्थिक फायदा होणार आहे.
सार्वजनिक वाहतुकीचा नियमित वापर करणाऱ्या प्रवाशांना प्रोत्साहन देण्यासाठी महामंडळाने विशेष योजना आखली आहे. या योजनेअंतर्गत, एका वर्षाच्या कालावधीत किमान २५० दिवस प्रवास पूर्ण करणाऱ्या स्मार्ट ट्रान्झिट कार्डधारकांना ३० टक्के सवलतीचा ‘लॉयल्टी बोनस’ दिला जाईल. ही सवलत एका वर्षाची मुदत पूर्ण झाल्यानंतर लागू होणार आहे.
वाढीव सवलतींचा जास्तीत जास्त प्रवाशांनी लाभ घ्यावा, या उद्देशाने कदंब महामंडळाकडून २ नोव्हेंबरपासून राज्यातील प्रमुख बसस्थानकांवर सात दिवसांच्या स्मार्ट ट्रान्झिट कार्ड नोंदणी व विक्री शिबिरांचे आयोजन करण्यात येणार आहे. ही शिबिरे पणजी, म्हापसा, साखळी, मडगाव आणि फोंडा या पाच प्रमुख बसस्थानकांवर भरवली जातील.
सध्या स्मार्ट ट्रान्झिट कार्ड नसलेल्या प्रवाशांना कार्ड मिळवणे सोपे जावे, यासाठी ही शिबिरे आयोजित केली जात आहेत. या सर्व ठिकाणी कदंबचे अधिकारी उपस्थित राहून प्रवाशांना अर्ज प्रक्रिया पूर्ण करणे व नवीन कार्ड जारी करण्यासाठी मदत करतील.
ऑनलाइन अर्जाची सुविधा उपलब्ध
स्मार्ट ट्रान्झिट कार्ड बसस्थानकांतील शिबिरांमधून घेण्यासोबतच, प्रवाशांना कदंबच्या अधिकृत संकेतस्थळावर (https://cashless.ktel.goa.gov.in/) ऑनलाइन अर्ज करण्याची सोयही उपलब्ध करून देण्यात आली आहे. या वाढीव सवलती, लॉयल्टी बोनस आणि नोंदणी मोहिमेच्या माध्यमातून गोव्यातील सार्वजनिक वाहतूक अधिक परवडणारी, सुलभ आणि आकर्षक बनवण्याचे उद्दिष्ट कदंब महामंडळाने ठेवले आहे. तसेच, महामंडळाच्या सेवांवर विश्वास ठेवून नियमित प्रवास करणाऱ्या प्रवाशांच्या सहभागाची दखल घेऊन त्यांना योग्य ते प्रोत्साहन देण्याचा प्रयत्न केला जात आहे.