मडगाव : गोव्यातील मडगावजवळील दमन-राय परिसरात शनिवारी पहाटेच्या सुमारास एका घराला आग लावून मालमत्तेचे अंशतः नुकसान केल्याची गंभीर घटना उघडकीस आली आहे. याप्रकरणी मायणा-कुडतरी पोलिसांनी तत्परतेने कारवाई करत संशयित महिला सरला बाबुराव पाटील हिच्याविरुद्ध गुन्हा दाखल केला आहे. संशयित महिला ही मूळची महाराष्ट्रातील जळगाव येथील रहिवासी असून, वैयक्तिक वादातून तिने हे कृत्य केल्याचे प्राथमिक तपासात निष्पन्न झाले आहे.
पोलीस सूत्रांकडून मिळालेल्या अधिकृत माहितीनुसार, शनिवारी पहाटे सुमारे ४:२८ वाजण्याच्या सुमारास ही आगीची घटना घडली. आगीच्या ज्वाळा आणि धुराचे लोट दिसताच परिसरात काही काळ भीतीचे वातावरण निर्माण झाले होते. या आगीत तक्रारदार रेणुका महत्पती यांच्या घराचे मोठे नुकसान झाले. घटनेनंतर घरमालक रेणुका महत्पती यांनी तात्काळ मायणा-कुडतरी पोलीस ठाण्यात धाव घेऊन संशयित महिला सरला पाटील हिच्याविरोधात रीतसर तक्रार नोंदवली.
तक्रारीच्या आधारे पोलिसांनी केलेल्या प्राथमिक चौकशीत या गुन्ह्यामागील कारण समोर आले आहे. संशयित सरला पाटील आणि तक्रारदार रेणुका यांच्या दिर मल्लेश नाईक यांच्यात मैत्रीपूर्ण संबंध होते. मात्र, गेल्या काही दिवसांपासून त्यांच्यात विविध कारणांवरून तीव्र मतभेद आणि वाद निर्माण झाले होते. याच वादाचा राग मनात धरून संशयित महिलेने हे टोकाचे पाऊल उचलत रेणुका यांच्या घराला आग लावल्याचा आरोप करण्यात आला आहे.
घटनेची गांभीर्याने दखल घेत मायणा-कुडतरी पोलिसांनी गुन्ह्याची नोंद केली असून, परिसरातील परिस्थितिजन्य पुरावे गोळा करण्याचे काम सुरू केले आहे. या प्रकरणाचा पुढील सखोल आणि कायदेशीर तपास मायणा-कुडतरी पोलीस ठाण्याच्या पोलीस उपनिरीक्षक वेरोनिका कुतिन्हो करत आहेत.