एसटी समाजातील ३३४ महिलांना ‘आयव्हीएफ’द्वारे मातृत्वाचे सुख

पणजी :ज्या महिलांना गर्भधारणा होत नाही, अशा ३०० हून अधिक गरजू एसटी समाजातील महिलांना मातृत्व योजनेअंतर्गत ‘आयव्हीएफ’ उपचार देऊन मातृत्वाचे सुख मिळवून देण्यात आले आहे. गेल्या पाच वर्षांत या महिलांच्या आयव्हीएफ उपचारांवर सरकारने १६ कोटी रुपयांहून अधिक खर्च केला आहे. आयव्हीएफ उपचारापासून रुग्णालयात बाळाचा जन्म होईपर्यंतचा संपूर्ण खर्च या योजनेअंतर्गत केला जातो, अशी माहिती आदिवासी कल्याण खात्याने दिली.

एसटी समाजातील ज्या जोडप्यांना लग्नाला तीन वर्षे उलटूनही मूल होत नाही आणि गर्भधारणेसाठी आयव्हीएफ उपचार घ्यायचे आहेत, त्यांना आदिवासी कल्याण खात्याच्या ‘मातृत्व’ योजनेअंतर्गत आर्थिक साहाय्य मिळते, असे खात्याच्या वरिष्ठ अधिकाऱ्यांनी सांगितले.

या योजनेचा लाभ घ्यायचा असल्यास पती किंवा पत्नी यापैकी कोणीही एक जण किंवा दोघेही एसटी समाजातील असणे आवश्यक आहे. तसेच या योजनेसाठी उत्पन्नाची कोणतीही मर्यादा नाही. ज्या जोडप्यांमध्ये वंध्यत्वाचे निदान झाले आहे, त्यांनाच या योजनेचा लाभ मिळतो.

पाच लाखांपर्यंत आर्थिक साहाय्य

पहिल्या अपत्यासाठीच लाभ

उपचारापासून प्रसूतीपर्यंत खर्चाची जबाबदारी

‘मातृत्व’ योजनेचा उद्देश आर्थिक अडचणींमुळे आयव्हीएफ उपचार घेणे शक्य नसलेल्या एसटी समाजातील पात्र जोडप्यांना मदत करणे हा आहे. उपचाराची प्रक्रिया सुरू झाल्यापासून रुग्णालयात बाळाचा जन्म होईपर्यंतच्या पात्र वैद्यकीय खर्चाचा समावेश या योजनेत करण्यात आला आहे.