पणजी : गोव्यातील दोन्ही विमानतळांवरील आंतरराष्ट्रीय प्रवासी वाहतुकीत एप्रिल ते जून या तिमाहीत मोठी घट नोंदवण्यात आली आहे. दाबोळी विमानतळावरील आंतरराष्ट्रीय प्रवासी वाहतूक तब्बल ६९ टक्क्यांनी तर मोपा येथील मनोहर आंतरराष्ट्रीय विमानतळावरील वाहतूक ४२ टक्क्यांनी घसरली. देशातील विविध विमानतळांवर नोंदवलेल्या घसरणींपैकी ही घट सर्वाधिक ठरली आहे.
राष्ट्रीय पातळीवरही एप्रिल-जूनदरम्यान भारतातून होणाऱ्या आंतरराष्ट्रीय प्रवासी वाहतुकीत सुमारे १० टक्क्यांची घट झाली. विशेष म्हणजे, या काळात भारतीय विमान कंपन्यांच्या माध्यमातून प्रवास करणाऱ्या आंतरराष्ट्रीय प्रवाशांची संख्या २७ टक्क्यांनी कमी झाली. याउलट, परदेशी विमान कंपन्यांच्या प्रवासी संख्येत ६ टक्क्यांची वाढ झाली.
गोव्याच्या दोन्ही विमानतळांवरील या मोठ्या घसरणीमुळे राज्याच्या आंतरराष्ट्रीय हवाई वाहतुकीबद्दल चिंता व्यक्त होत आहे. दाबोळी आणि मोपा या दोन्ही विमानतळांवरील आंतरराष्ट्रीय उड्डाणांचे वेळापत्रक, मार्गांची उपलब्धता आणि विमान कंपन्यांच्या सेवांमध्ये झालेल्या बदलांचा प्रवासी वाहतुकीवर परिणाम झाल्याचे दिसून येत आहे.
गोवा हे प्रमुख आंतरराष्ट्रीय पर्यटन केंद्र असल्याने आंतरराष्ट्रीय हवाई प्रवासी वाहतुकीतील ही घट पर्यटन क्षेत्रालाही बाधक मानली जात आहे. देशभरात भारतीय विमान कंपन्यांच्या प्रवासी संख्येत झालेली मोठी घट आणि परदेशी विमान कंपन्यांकडे वाढलेला प्रवासी कल याकडेही विमान वाहतूक क्षेत्राचे लक्ष लागले आहे.