पर्तगाळी जीवोत्तम मठात रंगला ‘भक्तिमहोत्सव’ कार्यक्रम

पैंगीण :श्री संस्थान गोकर्ण पर्तगाळी जीवोत्तम मठ येथे परमपूज्य श्रीमद् विद्याधीश तीर्थ श्रीपाद वडेर स्वामी महाराजांच्या चातुर्मास व्रतोत्सवानिमित्त गुरुवार, १३ ऑगस्ट २०२६ रोजी ‘भक्तिमहोत्सव’ हा भक्तिगीतांचा कार्यक्रम उत्साहात पार पडला. ‘गोवन वार्ता’, ‘प्रुडंट मीडिया नेटवर्क’ आणि ‘गोवा कला व संस्कृती खाते’ यांच्या संयुक्त विद्यमाने या सांगीतिक कार्यक्रमाचे आयोजन करण्यात आले होते. भक्तिरसात रंगलेल्या या सुवर्णसंध्येला मोठ्या संख्येने रसिकांची उपस्थिती लाभली.

सुरेल गायनाने रंगली सांगीतिक मैफल

भक्तिमहोत्सवात ऋषिकेश साने आणि गार्गी सिद्धये यांच्या सुरेल गायनाने उपस्थित रसिकांची मने जिंकली. त्यांना हार्मोनियमवर धनराज मडकईकर, तबल्यावर रुद्राक्ष वझे, पखवाजवर केदार धामणस्कर, तर ताल आणि रिदमवर गोविंद गावठणकर यांनी साथसंगत केली. भक्तिगीतांच्या या मैफलीचा उपस्थितांनी मनमुराद आनंद घेतला.

डॉ. गोविंद भगत यांनी विविध जिवंत आणि प्राचीन उदाहरणांचा संदर्भ देत कार्यक्रमाचे प्रभावी सूत्रसंचालन केले. त्यांच्या निवेदनाला उपस्थित रसिकांनी टाळ्यांच्या कडकडाटात दाद दिली.

चातुर्मास व्रतोत्सवाचे औचित्य साधून भक्तिमहोत्सवाचे आयोजन करण्याची संधी मिळाल्याचे चातुर्मास समितीचे अध्यक्ष अनिल पै यांनी उपस्थितांचे स्वागत करताना सांगितले.