नवी दिल्ली : स्वातंत्र्यदिनाच्या पार्श्वभूमीवर राजधानी दिल्लीमध्ये सुरक्षा व्यवस्था अधिक कडक करण्यात आली आहे. संपूर्ण दिल्ली ‘हाय अलर्ट’वर ठेवण्यात आली आहे. नागरिकांमध्ये जागरूकता निर्माण करण्यासाठी तसेच फरार दहशतवाद्यांचा शोध घेण्यासाठी पोलिसांनी राजधानीतील प्रमुख आणि गर्दीच्या ठिकाणी १९ ‘मोस्ट वॉन्टेड’ दहशतवाद्यांची छायाचित्रे व ओळख पटविणारी माहिती असलेले पोस्टर लावले आहेत. (Delhi On High Alert Ahead Of I-Day: Posters Of 19 Wanted Terrorists Put Up Across Capital)
या पोस्टरमध्ये इंडियन मुजाहिदीन, अल-कायदा तसेच विविध खलिस्तानी दहशतवादी संघटनांशी संबंधित संशयितांचा समावेश आहे. दहशतवाद्यांची माहिती नागरिकांपर्यंत पोहोचवून त्यांच्याबाबत काही माहिती मिळाल्यास ती तातडीने पोलिसांना देण्याचे आवाहन करण्यात आले आहे.
पोस्टरमध्ये इंडियन मुजाहिदीनशी संबंधित रियाज भटकळ आणि शबांद्री मोहम्मद इक्बाल उर्फ इक्बाल भटकळ यांचा समावेश आहे. तसेच अल-कायदाशी संबंधित मोहम्मद शर्जील अख्तर, अबू सुफियान आणि सय्यद मोहम्मद अरशियन यांचीही नावे आहेत.
खलिस्तानी दहशतवाद्यांमध्ये खलिस्तान झिंदाबाद फोर्सचा रंजीत सिंह उर्फ नीता आणि परमजीत सिंह पम्मा, तसेच खलिस्तान टायगर फोर्सचा अर्शदीप सिंह उर्फ अर्श डल्ला यांचा समावेश आहे.
१५ ऑगस्ट जवळ येत असल्याने दिल्ली पोलिसांसह विविध सुरक्षा यंत्रणांनी रेल्वे स्थानके, बसस्थानके, बाजारपेठा, धार्मिक स्थळे आणि इतर संवेदनशील ठिकाणी निगराणी वाढवली आहे. महत्त्वाच्या ठिकाणी अतिरिक्त सुरक्षा तैनात करण्यात आली असून; संशयास्पद व्यक्ती किंवा हालचालींवर बारकाईने लक्ष ठेवले जात आहे.
स्वातंत्र्यदिनाच्या कार्यक्रमांच्या पार्श्वभूमीवर संभाव्य धोका टाळण्यासाठी सुरक्षा यंत्रणांमध्ये समन्वय वाढवण्यात आला आहे. नागरिकांनी सतर्क राहावे आणि संशयास्पद व्यक्ती किंवा हालचाली आढळल्यास तातडीने पोलिसांना माहिती द्यावी, असे आवाहन प्रशासनाने केले आहे.