म्हापसा : गोवा नगर आणि ग्राम रचना (टीसीपी) कायद्यातील वादग्रस्त कलम ३९-ए विरोधात वाढत असलेल्या विरोधाच्या पार्श्वभूमीवर थिवी ग्रामसभेने रविवारी हे कलम रद्द करण्याची मागणी करणारा ठराव एकमताने मंजूर केला. त्याचबरोबर मेगा प्रकल्पांना परवाने देण्यापूर्वी गावाच्या वहनक्षमतेचा अभ्यास करावा, अशी मागणीही करण्यात आली. तसा ठराव ग्रामसभेने मंजूर केला.
हळदोणा, इासगाव आणि नास्नोळा येथील ग्रामसभांनी कलम ३९-ए रद्द करण्यासाठी असेच ठराव मंजूर केल्यानंतर एका आठवड्याने थिवी ग्रामसभेने हा ठराव घेतला आहे. जमिनीच्या मोठ्या प्रमाणावरील वापराच्या बदलामुळे या कलमावर टीका होत आहे.
थिवी ग्रामसभेने आणखी एक महत्त्वाचा ठराव मंजूर केला, ज्यामध्ये ग्रामपंचायतीला आवाहन करण्यात आले की, गावाच्या ‘वहनक्षमतेचा’ वैज्ञानिक अभ्यास केल्याशिवाय मोठ्या बांधकाम प्रकल्पांना परवानगी देऊ नये.
हा मुद्दा मांडताना स्थानिक रहिवासी रॉबर्ट कुलासो यांनी आरोप केला की, ग्रामस्थांचा विरोध असूनही कलम ३९-ए अंतर्गत टिविममधील सुमारे तीन लाख चौरस मीटर जमिनीचा वापर बदलण्यात आला आहे.
आमची मौल्यवान जमीन वाचवण्यासाठी अनेक समान विचारसरणीचे ग्रामस्थ आवाज उठवत आहेत, परंतु अधिकारी हे आवाज दाबण्याचा प्रयत्न करत आहेत. जमिनीची मनमानी आणि बेकायदेशीर विक्रीला आव्हान दिल्याबद्दल आणि विरोध केल्याबद्दल थिवी कोमुनिदादने २२ ग्रामस्थांविरुद्ध मानहानीचे खटले दाखल केले आहेत, असे कुलासो यांनी ग्रामसभेत सांगितले.
मॉली डिसिल्व्हा यांनी, गावात मोठ्या प्रमाणावर विकासकामांना परवानगी देण्यापूर्वी सर्वसमावेशक ‘वहनक्षमता अभ्यास’ करण्याच्या गरजेवर भर दिला. त्या म्हणाल्या की, मोठ्या प्रकल्पांना भविष्यातील मंजुरी ही गावाच्या अतिरिक्त विकासाचा भार पेलण्याच्या क्षमतेवर आधारित असावी.
दोन्ही ठराव एकमताने मंजूर
या बैठकीत राज्य सरकारच्या ‘माझे घर’ आणि ‘माझे फ्लॅट’ या गृहनिर्माण योजनांवरही चर्चा झाली. जेव्हा ग्रामस्थांनी या योजनांबद्दल सविस्तर माहिती विचारली, तेव्हा फर्नांडिस यांनी कबूल केले की या योजनांची माहिती देण्यासाठी त्यांच्याकडे पुरेशी माहिती उपलब्ध नाही. त्यानंतर ग्रामस्थांनी संबंधित विभागाच्या अधिकाऱ्यांच्या उपस्थितीत एक विशेष ग्रामसभा आयोजित करून रहिवाशांना या योजनांची माहिती देण्याची सूचना केली.