दिल्ली पोलिसांनी सीमेवर रोखले; कडेकोट बंदोबस्त
नवी दिल्ली : प्रस्तावित भारत-अमेरिका व्यापार कराराच्या विरोधात आंदोलन करण्यासाठी दिल्लीकडे निघालेल्या पंजाब आणि हरियाणातील शेतकऱ्यांना दिल्ली पोलिसांनी राजधानीत प्रवेश करण्यापासून रोखले. बहादुरगड सीमेसह दिल्लीच्या विविध प्रवेशद्वारांवर कडेकोट बंदोबस्त ठेवत मोठ्या प्रमाणावर बॅरिकेड्स उभारण्यात आले. (India-US trade deal protest: Delhi Police set up barricades on Bahadurgarh border)
बहादुरगड सीमेवरील अर्बन एक्स्टेन्शन रोड-२ (UER-2) येथे हरियाणा आणि दिल्ली पोलिसांनी पंजाबमधून आलेल्या शेतकऱ्यांच्या पाच बस अडविल्या. **'देश बचाओ मोर्चा'**च्या नेतृत्वाखाली हे शेतकरी दिल्लीतील किसान घाट येथे आयोजित एकदिवसीय बैठक आणि धरणे आंदोलनासाठी जात होते.
सोमवारी रात्री पंजाबमधून हरियाणात दाखल झालेल्या शेतकऱ्यांनी मंगळवारी सकाळी दिल्लीत प्रवेश करण्याचा प्रयत्न केला. मात्र, हरियाणा पोलिसांनी महामार्गावर बहुस्तरीय बॅरिकेड्स उभारून त्यांचा मार्ग रोखला. यावेळी शेतकरी आणि पोलिसांमध्ये काही काळ तणावाचे वातावरण निर्माण झाले, मात्र अखेरीस पोलिसांनी शेतकऱ्यांचा ताफा पुढे जाण्यापासून रोखला.
आंदोलनाचा दिल्लीतील इतर आंदोलनाशी संबंध नाही
भारतीय किसान युनियनचे (खोसा) अध्यक्ष सुखजिंदर खोसा यांनी सांगितले की, हे आंदोलन केवळ शेतकऱ्यांच्या हितासाठी आहे. प्रस्तावित भारत-अमेरिका व्यापार कराराला विरोध करण्यासाठी आयोजित करण्यात आले आहे. "आमच्या आंदोलनाचा दिल्लीतील इतर कोणत्याही आंदोलनाशी संबंध नाही. आम्ही फक्त शेतकऱ्यांच्या प्रश्नांवर आणि प्रस्तावित व्यापार कराराविरोधात आवाज उठवत आहोत," असे त्यांनी स्पष्ट केले.
प्रस्तावित भारत-अमेरिका व्यापार करारामुळे देशातील कृषी क्षेत्रावर आणि शेतकऱ्यांच्या हितावर विपरीत परिणाम होण्याची भीती व्यक्त करत शेतकरी संघटनांनी केंद्र सरकारने हा करार पुनर्विचारासाठी थांबवावा, अशी मागणी केली आहे.
