एका बाजूला ९० व्या मिनिटाला लाल कार्ड मिळाल्याने मैदानावर १० खेळाडू उरल्यामुळे बॅकफूटवर गेलेला अर्जेंटिना आणि दुसऱ्या बाजूला विश्वविजेतेपदाच्या महत्त्वाकांक्षेने आसूसलेला स्पेन! निर्धारित ९० मिनिटांचा खेळ शून्य-शून्य असा बरोबरीत सुटल्याने सामन्याचा निकाल लावण्यासाठी अवांतर वेळेचा अवलंब करण्यात आला. अवांतर वेळेत स्पेनने अर्जेंटिनाच्या गोलपोस्टवर एकामागून एक धडाकेबाज हल्ले चढवले. अखेर टॉरेसने अर्जेंटिनाची मजबूत तटबंदी भेदत गोलजाळ्याचा अचूक वेध घेतला आणि स्पेनने तब्बल १६ वर्षांनंतर पुन्हा एकदा विश्वचषकावर आपले नाव कोरले.
या ऐतिहासिक महामुकाबल्यात अर्जेंटिनाचा कर्णधार आणि दिग्गज फुटबॉलपटू लिओनेल मेस्सी याला पूर्णपणे निष्प्रभ ठेवणे, हाच स्पेनच्या विजयाचा मुख्य पाया ठरला. स्पेनने मेस्सीला रोखण्यासाठी अत्यंत शिस्तबद्ध आणि आक्रमक रणनीती आखली होती. मेस्सीकडे जेव्हा जेव्हा चेंडू आला, तेव्हा स्पेनच्या दोन ते तीन खेळाडूंनी त्याला क्षणाचाही विलंब न लावता लगेच घेरले. स्पेनच्या मिडल फिल्डर फळीने रोड्रिगो डी पॉल आणि अलेक्सिस मॅक अॅलिस्टर यांच्याकडून मेस्सीकडे येणारे पासेस रोखण्यावर भर दिला. मेस्सीने आपल्या नेहमीच्या शैलीत ड्रिबलिंग करण्याचा प्रयत्न करताच, स्पेनच्या मध्यवर्ती बचावपटूंनी अत्यंत अचूक आणि शारीरिकदृष्ट्या आक्रमक टॅकल करून त्याचा वेग आणि दिशा रोखली.
मेस्सीसारख्या महान खेळाडूला एकट्या-दुकट्या खेळाडूने रोखणे अशक्य असल्याने स्पेनने ‘सांघिक बचाव’ ही नीती अवलंबली. मेस्सीला पूर्ण सामन्यात एकही गोल करू दिला नाही, तसेच त्याला ‘शॉट ऑन टार्गेट’ मारण्याची संधीही स्पेनच्या बचावपटूंनी दिली नाही.
सामन्यावर स्पेनचे पूर्ण वर्चस्व पाहायला मिळाले. स्पेनने तब्बल ६५ टक्के बॉल पझेशन राखत अर्जेंटिनाच्या गोलपोस्टवर १४ फटके मारले, ज्यातील ८ फटके थेट टार्गेटवर होते. अर्जेंटिनाचा गोलरक्षक एमिलियानो मार्टिनेझ याने तब्बल ८ उत्कृष्ट सेव्हज करत स्पेनला निर्धारित वेळेत गोल करण्यापासून रोखून धरले. मात्र, सामन्याच्या ९० व्या मिनिटाला अर्जेंटिनाचा स्टार मिडफिल्डर एनझो फर्नांडिस याला दुसरे यलो कार्ड म्हणजेच ‘रेड कार्ड’ मिळाल्याने त्याला मैदानाबाहेर जावे लागले. यामुळे अर्जेंटिनाला उर्वरित अवांतर वेळेत १० खेळाडूंसह खेळावे लागले, ज्याचा पुरेपूर फायदा स्पेनने उठवला.
अनुभवी मेस्सी विरुद्ध युवा यमाल यांच्यातील या लढतीकडे ‘ड्रीम फायनल’ म्हणून पाहिले गेले, ज्यामध्ये अखेर स्पेनच्या युवा रक्ताने आणि चतुर रणनीतीने बाजी मारली.
- प्रवीण साठे
