मुख्यमंत्र्यांकडून २०२८ च्या लॉस एंजेलिस ऑलिम्पिकसाठी विशेष आर्थिक मदतीची घोषणा
पणजी : गोव्याचा आंतरराष्ट्रीय दर्जाचा स्क्वॉशपटू यश फडते याच्या उल्लेखनीय कामगिरीचा गौरव करत मुख्यमंत्री डॉ. प्रमोद सावंत (Chief Minister Dr. Pramod Sawant) यांनी त्याच्या कुटुंबीयांची भेट घेऊन 'एक्सलन्स इन स्पोर्ट्स अवॉर्ड' तसेच ₹१२.५० लाखांची आर्थिक मदत प्रदान केली. याशिवाय २०२८ मध्ये होणाऱ्या लॉस एंजेलिस ऑलिम्पिक स्पर्धेच्या तयारीसाठी विशेष आर्थिक सहाय्यही देण्यात येईल, अशी घोषणा केली.
मुख्यमंत्री डॉ. सावंत यांनी सांगितले की, यश फडतेने आपल्या सातत्यपूर्ण आणि उत्कृष्ट कामगिरीमुळे गोव्यासह देशाचे नाव आंतरराष्ट्रीय स्तरावर उज्ज्वल केले आहे. स्पेनमध्ये झालेल्या बार्सिलोना ग्लोबल स्क्वॉश टूर-१ स्पर्धेत विजेतेपद पटकावणे तसेच अमेरिकेतील प्रतिष्ठेचा स्किलमॅन पुरस्कार मिळवणे ही त्याच्या कारकिर्दीतील उल्लेखनीय यशे आहेत.
यशची जिद्द, शिस्त, कठोर परिश्रम आणि उत्कृष्टतेचा ध्यास हा गोव्यातील युवा खेळाडूंसाठी प्रेरणादायी असल्याचे मुख्यमंत्री म्हणाले. त्याच्या यशामुळे राज्यातील अनेक युवकांना आंतरराष्ट्रीय क्रीडा क्षेत्रात करिअर करण्याची प्रेरणा मिळत आहे, असेही त्यांनी नमूद केले.
राज्य सरकार क्रीडापटूंना आवश्यक त्या सर्व सुविधा आणि आर्थिक पाठबळ देण्यासाठी कटिबद्ध असल्याचे सांगताना, गुणवंत खेळाडूंना जागतिक स्तरावर यश मिळवून देण्यासाठी सर्वतोपरी सहकार्य केले जाईल, असा विश्वास मुख्यमंत्री डॉ. सावंत यांनी व्यक्त केला.
गोव्यातील क्रीडा क्षेत्र अधिक सक्षम करण्याच्या दिशेने सरकार सातत्याने प्रयत्नशील असून, 'विकसित गोवा' घडविण्याच्या संकल्पनेत क्रीडा क्षेत्राला विशेष महत्त्व दिले जात असल्याचेही त्यांनी स्पष्ट केले.
