एसआयटीची कारवाई; तपासाची व्याप्ती वाढली
डेहराडून/बद्रीनाथ : उत्तराखंडमधील प्रसिद्ध बद्रीनाथ धाम (Badrinath Dham) येथील देणगी निधीतील कथित गैरव्यवहारप्रकरणी विशेष तपास पथकाने (एसआयटी) सोमवारी अर्पण व देणगी अधिकारी प्रमोद नौटियाल या मुख्य संशयिताला अटक केली. डेहराडून येथून रात्री अटक करण्यात आल्यानंतर त्याला पुढील चौकशीसाठी बद्रीनाथ येथे नेण्यात आले.
एसआयटीच्या माहितीनुसार, मंदिरातील देणग्यांच्या व्यवस्थापनात गंभीर अनियमितता झाल्याचा आरोप नौटियाल यांच्यावर असून, तपासादरम्यान इतर संबंधित व्यक्तींचाही सहभाग समोर आल्यास त्यांच्यावरही कारवाई करण्यात येणार आहे.
या प्रकरणाची सुरूवात या महिन्याच्या २ जुलै रोजी मंदिरातील थाळी देणग्यांच्या मोजणीदरम्यान आढळलेल्या अनियमिततेपासून झाली. अंतर्गत चौकशीत देणगी मोजणी प्रक्रियेत गंभीर त्रुटी आढळल्यानंतर प्रथम विभागीय चौकशी करण्यात आली. त्यानंतर पोलिसांत गुन्हा दाखल करण्यात आला आणि तपास एसआयटीकडे सोपविण्यात आला.
तपासादरम्यान मंदिराच्या देणगी मोजणी कक्षातून रोख रक्कम व अन्य मौल्यवान अर्पणांचा अपहार झाल्याचा संशय व्यक्त करण्यात आला आहे. या प्रकरणात नौटियाल यांनी यापूर्वी एफआयआर आणि निलंबनाविरोधात उच्च न्यायालयात धाव घेतली होती.
देशातील सर्वात पवित्र हिंदू तीर्थक्षेत्रांपैकी एक असलेल्या बद्रीनाथ मंदिरातील या कथित गैरव्यवहारामुळे भाविक संताप व्यक्त करीत आहेत. धार्मिक नेते आणि लोकप्रतिनिधींनी दोषींवर कठोर कारवाईची मागणी केली आहे.
दरम्यान, उत्तराखंड सरकारनेही (Uttarakhand Government) तपासात दोषी आढळणाऱ्या कोणालाही पाठीशी घातले जाणार नाही, अशी स्पष्ट भूमिका घेतली आहे. एसआयटीकडून देणगी व्यवस्थापन, निधीची अफरातफर आणि संबंधित अधिकाऱ्यांची भूमिका यांचा सखोल तपास सुरू आहे.
