हॅरी केनच्या जोरावर इंग्लंड, बालोगनच्या जोरावर अमेरिका उपांत्यपूर्व फेरीत
अटलांटा: फिफा विश्वचषक २०२६ च्या बाद फेरीत गुरुवारी अत्यंत नाट्यमय आणि ऐतिहासिक लढती पाहायला मिळाल्या. इंग्लंडने पिछाडीवरून मुसंडी मारत डीआर काँगोचा २-१ असा पराभव केला, तर दुसऱ्या बाजूला बेल्जियमने फुटबॉल इतिहासातील सर्वांत अविश्वसनीय पुनरागमन करत सेनेगलवर ३-२ अशी मात केली. सह-यजमान अमेरिकेनेही बोस्निया अँड हर्जेगोव्हिनाला २-० ने धूळ चारात तब्बल २४ वर्षांनंतर बाद फेरीत विजय मिळवला. या विजयांसह इंग्लंड, बेल्जियम आणि अमेरिका यांनी उप-उपांत्यपूर्व फेरीत आपले स्थान निश्चित केले आहे.
इंग्लंडने रचला ६० वर्षांनंतरचा इतिहास
अटलांटा स्टेडियमवर खेळवल्या गेलेल्या सामन्यात इंग्लंडने डीआर काँगोचे आव्हान २-१ असे परतावून लावले. पहिल्यांदाच विश्वचषकाच्या बाद फेरीत खेळणाऱ्या डीआर काँगोने सुरुवातीलाच सर्वांना धक्का दिला. सामन्याच्या ७ व्या मिनिटाला चान्सेल म्बेम्बाच्या पासवर ब्रायन सिपेग्नाने लो-शॉट मारत इंग्लंडचा गोलरक्षक जॉर्डन पिकफोर्डला चकवले आणि संघाला १-० अशी आघाडी मिळवून दिली. ब्रायनचा हा पहिलाच आंतरराष्ट्रीय गोल होता. यानंतर काँगोचा गोलरक्षक लिओनेल म्पासीने उत्कृष्ट बचाव करत पहिल्या सत्रात इंग्लंडला एकही गोल करू दिला नाही.
अखेरच्या १५ मिनिटांत केनचे वादळ
मध्यांतरापर्यंत ०-१ ने पिछाडीवर असलेल्या इंग्लंडला कर्णधार हॅरी केनने संकटातून बाहेर काढले. सामन्याच्या ७५ व्या मिनिटाला अँथनी गॉर्डनच्या उत्कृष्ट पासवर केनने अप्रतिम हेडर करत सामन्यात १-१ अशी बरोबरी साधली. यानंतर ठीक ११ मिनिटांनी, म्हणजेच ८६ व्या मिनिटाला केनने पुन्हा एकदा काँगोच्या बचावपटूंना हुलकावणी देत दुसरा गोल केला आणि इंग्लंडला २-१ अशी विजयी आघाडी मिळवून दिली.
विश्वचषकाच्या इतिहासात मध्यांतरापर्यंत पिछाडीवर राहिल्यानंतर सामना जिंकण्याची इंग्लंडची ही १९६६ नंतरची पहिलीच वेळ आहे. १९६६ च्या विश्वचषक फायनलनंतर इंग्लंडला अशी कामगिरी करता आली नव्हती. आता ६ जुलै रोजी होणाऱ्या उप-उपांत्यपूर्व फेरीच्या सामन्यात इंग्लंडचा सामना मेक्सिकोशी होईल.
बेल्जियमचे थरारक पुनरागमन; १२५ व्या मिनिटाला विक्रमी गोल
सिएटलच्या ल्युमेन फील्ड स्टेडियमवर विश्वचषक इतिहासातील सर्वात नाट्यमय सामना पाहायला मिळाला. सेनेगलविरुद्ध बेल्जियमचा संघ ८६ व्या मिनिटापर्यंत ०-२ असा पिछाडीवर होता. सेनेगलसाठी हबीब दियारा (२५ वे मिनिट) आणि इस्माईल सार (५१ वे मिनिट) यांनी गोल करत २-० अशी भक्कम आघाडी घेतली होती. सेनेगलने केलेल्या सततच्या आक्रमणांना बेल्जियमचा अनुभवी गोलरक्षक थिबॉत कोर्टुवाने उत्कृष्ट बचाव करत रोखून धरले, ज्यामुळे सेनेगलची आघाडी वाढू शकली नाही.
शेवटच्या ४ मिनिटांत सामना फिरवला
८६ व्या मिनिटाला बेल्जियमचा बदली खेळाडू रोमेलु लुकाकूने पहिला गोल करत संघाचे पुनरागमन करून दिले. यानंतर अवघ्या तीन मिनिटांत, म्हणजेच ८९ व्या मिनिटाला युरी टायलेमन्सने गोल करत सामन्यात २-२ अशी बरोबरी साधली. सामना अतिरिक्त वेळेत गेला. अतिरिक्त वेळेच्या शेवटच्या मिनिटाला (१२० व्या मिनिटाला) युरी टायलेमन्सला सेनेगलच्या डी-एरियात पाडण्यात आले. व्हिडिओ असिस्टंट रेफ्रीच्या तपासणीनंतर पंचांनी बेल्जियमला पेनल्टी बहाल केली. यावर टायलेमन्सने १२५ व्या मिनिटाला गोल केला, जो फिफा विश्वचषकाच्या इतिहासातील सर्वात उशिरा झालेला गोल ठरला आहे. या गोलसह बेल्जियमने ३-२ असा विजय मिळवला. बाद फेरीत २ किंवा अधिक गोलने पिछाडीवर असताना सामना जिंकण्याची बेल्जियमची ही दुसरी वेळ आहे; यापूर्वी २०१८ मध्ये त्यांनी जपानविरुद्ध अशीच कामगिरी केली होती.
१० खेळाडूंसह अमेरिकेचा लढा
कॅलिफोर्निया येथे खेळवल्या गेलेल्या सामन्यात सह-यजमान अमेरिकेने बोस्निया अँड हर्जेगोव्हिनाचा २-० असा पराभव करत २४ वर्षांनंतर विश्वचषकाच्या बाद फेरीत विजय नोंदवला. अमेरिकेसाठी हा विजय ऐतिहासिक ठरला.
सामन्याच्या ४५ व्या मिनिटाला फॉलरिन बालोगनने मलिक टिलमनच्या पासवर गोल करत अमेरिकेला १-० अशी आघाडी मिळवून दिली आणि स्टेडियममधील चाहत्यांना जल्लोष करण्याची संधी दिली. मात्र, सामन्याच्या ६४ व्या मिनिटाला एक दुर्दैवी घटना घडली. बोस्नियाच्या तारिक मुहरेमोविचच्या पायावर बालोगनचा पाय पडल्याने व्हीएआरच्या पुनरावलोकनानंतर पंचांनी बालोगनला थेट ‘रेड कार्ड’ दाखवून मैदानाबाहेर काढले. हा निर्णय अत्यंत कडक आणि वादग्रस्त मानला जात आहे.
बालोगन बाहेर गेल्यामुळे अमेरिका संघात १० खेळाडू उरले होते. मात्र, अमेरिकेने आपला बचाव मजबूत ठेवला. सामन्याच्या उत्तरार्धात मलिक टिलमनने फ्री-किकवर एक शानदार गोल करत संघाचा २-० असा विजय निश्चित केला. आता सोमवारी सिएटल येथे होणाऱ्या बाद फेरीच्या सामन्यात अमेरिकेची लढत बेल्जियमविरुद्ध होणार आहे.
