'लिस्ट ए' फायनल : वैभव सूर्यवंशीची तूफान फलंदाजी; अवघ्या ११ चेंडूत झळकावले अर्धशतक

डंबुला : क्रिकेट हा अनिश्चिततेचा खेळ मानला जातो, पण जेव्हा एखाद्या खेळाडूकडे अफाट प्रतिभा आणि काहीतरी सिद्ध करण्याची जिद्द असते, तेव्हा मैदानावर केवळ इतिहास घडतो. श्रीलंकेत सुरू असलेल्या तिरंगी 'लिस्ट ए' मालिकेच्या अंतिम सामन्यात भारतीय संघाचा १५ वर्षांचा युवा फलंदाज वैभव सूर्यवंशी याने नेमके हेच करून दाखवले आहे. डंबुलाच्या रँगिरी आंतरराष्ट्रीय स्टेडियमवर रविवारी सकाळच्या सत्रात जे काही घडले, त्याने जागतिक क्रिकेट जगत थक्क झाले आहे. याआधी याच मालिकेत श्रीलंकन खेळाडूंसोबत झालेल्या वादाच्या केंद्रस्थानी सापडलेला आणि संपूर्ण मालिकेत धावांचा दुष्काळ अनुभवणारा वैभव फायनलच्या दिवशी अशा काही अवतारात मैदानात उतरेल, याची कल्पना प्रतिस्पर्धी संघाला नसावी. त्याने अवघ्या ११ चेंडूंमध्ये ५० धावा फटकावून लिस्ट 'ए' क्रिकेटच्या इतिहासातील सर्वात वेगवान अर्धशतकाचा २० वर्षांपूर्वीचा जागतिक विक्रम मोडीत काढला.

 लिस्ट 'ए' क्रिकेटमधील सर्वात कमी चेंडूत सर्वात वेगवान अर्धशतके

श्रीलंका 'अ' संघाने टॉस जिंकून प्रथम गोलंदाजी करण्याचा निर्णय घेतला. खेळपट्टीवर सुरुवातीला गवताचा हलका थर असल्याने वेगवान गोलंदाजांना मदत मिळेल असा अंदाज होता. मात्र, बिहारच्या समस्तीपूरमधून आलेल्या वैभव सूर्यवंशीच्या मनात काहीतरी वेगळेच चालले होते. त्याने डावाच्या पहिल्याच चेंडूवर लंकेच्या मोहम्मद शिराजला कडक चौकार मारून आपले इरादे स्पष्ट केले. सुरुवातीच्या सामन्यांमध्ये १४, ४४, २१ आणि ३८ अशा धावांमुळे त्याच्या फॉर्मवर टीका होत होती, पण आयपीएलमध्ये ७५० हून अधिक धावा कुटणाऱ्या या डावखुऱ्या फलंदाजाला मोठ्या मंचाचीच प्रतीक्षा होती. शिराजच्या दुसऱ्याच षटकात वैभवने रुद्र रूप धारण करत तीन षटकार आणि दोन चौकारांसह तब्बल २६ धावा वसूल केल्या आणि डंबुलाच्या स्टेडियममध्ये जमलेल्या प्रेक्षकांनी आयपीएलचा थरार अनुभवला.

वैभवने लॉन्ग-ऑनच्या वरून आपला पाचवा षटकार ठोकला आणि अवघ्या ११ चेंडूंत आपले अर्धशतक पूर्ण केले. यासह त्याने श्रीलंकेच्याच कौशल्या वीराटनेचा २००५ मधील १२ चेंडूंत अर्धशतक झळकावण्याचा २० वर्षांपूर्वीचा जागतिक विक्रम मोडीत काढला. तसेच देशांतर्गत क्रिकेटमध्ये सरफराज खानने नोंदवलेला १५ चेंडूंतील अर्धशतकाचा भारतीय विक्रमही सर केला. अर्धशतकानंतरही त्याचे वादळ शमले नाही. त्याने चौफेर फटकेबाजी करत अवघ्या २९ चेंडूंत ९४ धावांची तुफानी खेळी साकारली. वेगवान शतकाच्या उंबरठ्यावर असताना श्रीलंकन कर्णधार साहन आराचिगेच्या चेंडूवर मोठा फटका मारण्याच्या नादात तो ३० यार्डच्या सर्कलमध्ये झेलबाद झाला. त्याचे शतक अवघ्या ६ धावांनी हुकले असले, तरी पहिल्या पॉवरप्लेच्या आतच त्याने भारताला ११० धावांच्या पार पोहोचवून सामन्याचा निकाल जवळपास स्पष्ट केला होता.

बातमी अपडेट होत आहे.