चंपारण जिल्ह्यातील लग्नसोहळ्यात सप्तपदीपूर्वी नवरदेवाची प्रकृती अचानक बिघडल्याने घडली धक्कादायक घटना
पाटणा: नियतीचा क्रूर खेळ कधी आणि कसा समोर येईल, याचा नेम नाही. अशीच एक अंगावर काटा आणणारी आणि मन सुन्न करणारी अत्यंत दुर्दैवी घटना चंपारण जिल्ह्यातून समोर आली आहे. विवाहाचे विधी सुरू असताना, डोक्यावर अक्षता पडण्यापूर्वी आणि सप्तपदीची सात पावले चालण्याच्या अवघ्या काही मिनिटे आधीच २५ वर्षीय नवरदेवाचा अचानक प्रकृती बिघडून मृत्यू झाला. ज्या लग्नमंडपात काही क्षणांपूर्वी सनई-चौघड्यांचे सूर आणि आनंदाचे वातावरण होते, तिथे एकाएकी किंकाळ्या आणि अथांग शोकाचे वातावरण पसरले.
मिळालेल्या माहितीनुसार, मझौलिया येथील भरवलिया भागात राहणाऱ्या २५ वर्षीय शक्तिनाथ शर्मा या तरुणाचा विवाह पूर्व चंपारणच्या रामगढवा येथील एका तरुणीशी निश्चित झाला होता. गुरुवारी रात्री स्थानिक राम-जानकी मंदिरात या विवाहसोहळ्याचे अत्यंत थाटामाटात आयोजन करण्यात आले होते. वरात दारात पोहोचल्यानंतर वधूपक्षाकडून वधुवरांचे पारंपरिक आणि उत्साही स्वागत करण्यात आले. वर आणि वधू एकमेकांना हार घालणार, तोच नियतीने आपला डाव साधला.
विवाहाचे मुख्य विधी सुरू होण्यापूर्वी नवरदेव शक्तिनाथ यांच्या पोटात अचानक तीव्र वेदना सुरू झाल्या. सुरुवातीला हा त्रास किरकोळ किंवा जळजळीचा असावा असे वाटल्याने नातेवाइकांनी त्याकडे फारसे गांभीर्याने पाहिले नाही. मात्र, अवघ्या काही सेकंदांतच शक्तिनाथ यांची प्रकृती वेगाने खालावली आणि ते मंडपातच कोसळले. घाबरलेल्या कुटुंबीयांनी त्यांना तातडीने रक्सौल येथील एसआरपी (SRP) रुग्णालयात दाखल केले. मात्र, दुर्दैवाने डॉक्टरांनी त्यांना तपासून मृत घोषित केले आणि मृत्यू प्रमाणपत्र जारी केले.
लग्नाच्या पवित्र मंडपातून थेट स्मशानभूमीत जाण्याची वेळ आलेल्या या कुटुंबावर सध्या दुःखाचा डोंगर कोसळला आहे. दरम्यान, रुग्णालयाकडून तरुणाच्या मृत्यूचे नेमके कारण अद्याप स्पष्ट करण्यात आलेले नाही. त्यामुळे वैद्यकीय अनिश्चिततेचा गैरफायदा घेत गावात विविध उलटसुलट चर्चा सुरू झाल्या आहेत, तर काहींनी या दुर्दैवी घटनेचा संबंध अंधश्रद्धेशी जोडण्यास सुरुवात केली आहे. ऐन तारुण्यात लग्नाच्या मांडवात घडलेल्या या हृदयद्रावक घटनेमुळे संपूर्ण जिल्ह्यावर शोककळा पसरली असून तरुणाईमधून हळहळ व्यक्त होत आहे.
