निवडणूक होणाऱ्या ११ पालिकांच्या प्रभागांचा आकडा निश्चित

पणजी : आगामी नगरपालिका निवडणुका होणाऱ्या ११ नगरपालिकांमधील प्रभागांची संख्या निश्चित करणारी अधिसूचना राज्य निवडणूक आयोगाने जारी केली आहे. नव्या अधिसूचनेनुसार यापुढे २०११ च्या जनगणनेतील लोकसंख्येच्या आधारावर प्रभागांची संख्या निश्चित करण्यात आली आहे.

२०२१ च्या निवडणुकांच्या तुलनेत काही नगरपालिकांमध्ये प्रभागांची संख्या वाढविण्यात आली आहे. मडगाव, मुरगाव आणि कुडचडे-काकोडा येथे प्रत्येकी दोन प्रभाग वाढले आहेत, तर काणकोण, केपे, कुंकळ्ळी आणि डिचोली येथे प्रत्येकी एक प्रभाग वाढविण्यात आला आहे.

दुसरीकडे वाळपई, पेडणे, सांगे आणि म्हापसा नगरपालिकांमध्ये प्रभागसंख्येत कोणताही बदल करण्यात आलेला नाही.

मुरगाव, मडगाव, म्हापसा, कुडचडे-काकोडा, डिचोली, कुंकळ्ळी, केपे, काणकोण, वाळपई, पेडणे आणि सांगे या ११ नगरपालिकांचा कार्यकाळ एप्रिल आणि मे महिन्यात संपला आहे. प्रभाग फेररचना आणि आरक्षण प्रक्रिया व्यवस्थित पार पाडण्यासाठी सरकारने निवडणुका पुढे ढकलल्या आहेत.

या फेररचनेनंतर मोठ्या नगरपालिकांमध्ये लोकसंख्येनुसार प्रतिनिधित्व वाढवण्याचा प्रयत्न करण्यात आला असून, आगामी आरक्षण प्रक्रियेनंतर निवडणुकांचे पुढील वेळापत्रक निश्चित होण्याची शक्यता आहे.