गोव्यात ४० भूस्खलनप्रवण ठिकाणे धोकादायक; जिल्हाधिकाऱ्यांकडून यादी तयार

पणजी : गोव्यात यंदा पावसाळ्यात संभाव्य धोका टाळण्यासाठी ४० भूस्खलनप्रवण ठिकाणे निश्चित करण्यात आली आहेत. मामलेदारांनी दिलेल्या अहवालाच्या आधारे जिल्हाधिकाऱ्यांनी ही यादी तयार केली असून, या धोकादायक क्षेत्रांमध्ये आवश्यक त्या प्रतिबंधात्मक उपाययोजना करण्याची जबाबदारी सार्वजनिक बांधकाम खात्यावर सोपवण्यात आली आहे.

राज्यात मान्सून अद्याप दाखल झाला नसला तरी हलक्या पावसाला सुरुवात झाली आहे. मुसळधार पावसामुळे माती व दगड रस्त्यावर कोसळणे तसेच भूस्खलनामुळे घरांचे नुकसान होण्याच्या घटना वारंवार घडतात. त्यामुळे जीवित आणि सार्वजनिक मालमत्तेचे नुकसान टाळण्यासाठी संबंधित विभागांना खबरदारीचे उपाय राबवण्याचे निर्देश देण्यात आले आहेत.

गेल्या आठवड्यात पार पडलेल्या आपत्ती व्यवस्थापन समितीच्या बैठकीत धोकादायक क्षेत्रांची पाहणी आणि प्रतिबंधात्मक उपाययोजनांवर सविस्तर चर्चा करण्यात आली.

अतिवृष्टी झाल्यास डोंगरावरील माती व दगड रस्त्यावर वाहून येऊन वाहतुकीसाठी धोका निर्माण होतो. काही भागांत पावसाचे पाणी आणि माती थेट घरांमध्ये शिरते. यापूर्वी मुरगाव आणि सासष्टी तालुक्यांत अशा घटना घडल्याने यंदाच्या यादीत मुरगाव तालुक्याकडे विशेष लक्ष देण्यात आले आहे.