न्यायालयांमध्ये वकिली करणारे ३५ ते ४० टक्के वकील बोगस

नवी दिल्ली : देशातील न्यायालयांमध्ये प्रॅक्टिस करणाऱ्या वकिलांपैकी सुमारे ३५ ते ४० टक्के वकिलांकडे बनावट पदव्या आहेत. हे वकील बोगस प्रमाणपत्रांच्या आधारे वकिली करत असून बार कौन्सिल ऑफ इंडियाला (बीसीआय) याची माहिती आहे आणि त्यावर योग्य ती पावले उचलली जात आहेत, अशी माहिती ‘बीसीआय’चे अध्यक्ष आणि वरिष्ठ वकील मनन कुमार मिश्रा यांनी दिली.

न्यायालयीन संकुलांमध्ये काळे कोट आणि बँड घालून फिरणाऱ्यांपैकी सुमारे ३५ ते ४० टक्के लोक बोगस असल्याचा संशय व्यक्त करण्यात आला आहे. त्यांच्या पदव्या बनावट असल्याचा दावा करण्यात आला असून, त्या आधारावर काही जण न्यायालयात प्रॅक्टिस करत असल्याचे सांगण्यात आले.

बीसीआयने पदवी पडताळणी प्रक्रिया सुरू केल्यानंतर सुमारे ४० टक्के वकिलांनी पडताळणी फॉर्म भरले नाहीत. याच पार्श्वभूमीवर ही बाब सरन्यायाधीशांच्या निदर्शनास आणून देण्यात आल्याचे मिश्रा यांनी स्पष्ट केले.

सरन्यायाधीशांच्या एका तोंडी निरीक्षणानंतर सोशल मीडियावर सुरू झालेल्या चर्चेच्या पार्श्वभूमीवर मिश्रा यांनी स्पष्टीकरण दिले. न्यायालयात बनावट पदव्या घेऊन स्वतःला वकील म्हणून सादर करणाऱ्या लोकांविषयी चिंता व्यक्त करण्यात आली होती, असे त्यांनी सांगितले.

देशभरातील वकिलांच्या नोंदी आणि शैक्षणिक कागदपत्रांची पडताळणी करण्यासाठी बार कौन्सिलने मोहीम सुरू केली आहे. आवश्यक त्या प्रकरणांमध्ये पुढील कारवाई केली जाणार असल्याचे सांगण्यात आले आहे.