रिसॉर्ट व्यवस्थापकाकडे खंडणी मागीतल्या प्रकरणी राजेश दाभोलकरना अटक

पेडणे : गावडेवाडा-मोरजी येथील ‘मे. फेअर रिसॉर्ट’चे न्यायालयात प्रलंबित असलेले एक प्रकरण मिटवून देण्याच्या मोबदल्यात कोट्यवधी रुपयांची मागणी केल्याच्या आरोपावरून राजेश दाभोलकर यांना अटक करण्यात आली आहे. रिसॉर्टच्या व्यवस्थापकाने मांद्रे पोलिसांत दिलेल्या तक्रारीनंतर ही कारवाई करण्यात आली.

मोरजी येथील ‘मे. फेअर रिसॉर्ट’च्या व्यवस्थापकाने पोलिसांकडे लेखी तक्रार दाखल केली होती. तक्रारीनुसार, रिसॉर्टशी संबंधित एक प्रकरण न्यायालयात प्रलंबित असताना ते मिटवून देण्याचे आश्वासन देत संशयित आणि त्यांच्या इतर साथीदारांनी मोठ्या रकमेची मागणी केली.

पैसे न दिल्यास शिवीगाळ तसेच जीवे मारण्याची धमकी देण्यात आल्याचाही आरोप तक्रारीत करण्यात आला आहे.

तक्रारीनुसार, संशयिताने रिसॉर्ट परिसरात ड्रोनचा वापर करून मोठ्या प्रमाणावर फोटोशूटही केल्याचा आरोप करण्यात आला आहे. या सर्व बाबींचा तपास पोलिसांकडून सुरू आहे.

मांद्रे पोलिसांकडून प्रकरणातील आर्थिक व्यवहार, कथित धमक्या आणि इतर संबंधित बाबींचा तपास सुरू आहे. या गुन्ह्यातील इतर संबंधित व्यक्तींविषयी माहिती गोळा केली जात आहे.