केंद्राकडून प्रतिसाद नसल्याने ‘नमो ड्रोन दिदी’ उपक्रम लांबला

पणजी : राज्यात ग्रामीण महिलांसाठी राबवण्यात येणाऱ्या ‘नमो ड्रोन दिदी’ उपक्रमाला अद्याप अपेक्षित गती मिळालेली नाही. राज्य सरकारने सर्व प्राथमिक प्रक्रिया पूर्ण करून दहा स्वयंसहाय्यता गटांचा प्रस्ताव केंद्राकडे पाठवला असला, तरी ड्रोन उपलब्ध होण्याची प्रतीक्षा सुरू असल्याची माहिती कृषी खात्यातील वरिष्ठ अधिकाऱ्यांनी दिली.

‘नमो ड्रोन दिदी’ ही केंद्र सरकारची योजना असून ग्रामीण महिलांना ड्रोन पायलट आणि तंत्रज्ञ म्हणून प्रशिक्षित करून शेती क्षेत्रात उद्योजकतेच्या संधी निर्माण करण्यावर भर दिला जात आहे. आधुनिक कृषी तंत्रज्ञानाचा वापर वाढवणे आणि महिलांना शाश्वत उत्पन्नाचे साधन उपलब्ध करून देणे हे या योजनेचे प्रमुख उद्दिष्ट आहे.

राज्यात अद्याप एकही ‘ड्रोन दिदी’ कार्यरत नसून मार्च २०२५ मध्ये गोव्यातील दहा स्वयंसहाय्यता गटांची नावे केंद्रीय कृषी मंत्रालयाकडे पाठवण्यात आली आहेत.

ड्रोन उत्पादनासाठी लागणारे काही सुटे भाग पूर्वी मोठ्या प्रमाणावर आयात केले जात होते. मात्र, राष्ट्रीय सुरक्षेच्या पार्श्वभूमीवर काही आयातींवर निर्बंध लागू झाल्याने स्वदेशी तंत्रज्ञान विकसित करण्यावर भर देण्यात येत आहे.

स्वदेशी ड्रोन उपलब्ध झाल्यानंतर ही योजना वेगाने पुढे नेली जाईल आणि गोव्यासह इतर राज्यांतील स्वयंसहाय्यता गटांनाही त्याचा लाभ मिळेल, असे अधिकाऱ्यांनी सांगितले.