गोव्याकडे येणाऱ्या २५० संशयित बांगलादेशींना हुबळीत रोखले

पणजी : पश्चिम बंगाल, ओडिशा आणि इतर राज्यांमधून गोव्याच्या दिशेने प्रवास करणाऱ्या २५० हून अधिक संशयित स्थलांतरितांना कर्नाटकातील हुबळी येथे रोखण्यात आले असून त्यांच्या ओळख आणि कागदपत्रांची चौकशी सुरू आहे. या पार्श्वभूमीवर गोव्यातही अशा व्यक्ती दाखल होण्याची शक्यता लक्षात घेऊन राज्यभरातील पोलिसांना सतर्कतेच्या सूचना देण्यात आल्या आहेत.

शांत प्रदेश म्हणून ओळखल्या जाणाऱ्या गोव्यात यापूर्वीही विविध राज्यांतून आलेल्या संशयित व्यक्तींवर कारवाई करण्यात आल्याच्या पार्श्वभूमीवर, रेल्वे स्थानके, विमानतळ तसेच प्रमुख बसस्थानकांवर देखरेख वाढवण्याच्या सूचना देण्यात आल्या आहेत.

पोलीस महासंचालक आलोक कुमार यांनी संबंधित यंत्रणांना आवश्यक दक्षता घेण्याचे निर्देश दिल्याची माहिती समोर आली आहे.

घटनेची माहिती मिळाल्यानंतर वरिष्ठ पोलीस अधिकारी आणि महसूल विभागाचे कर्मचारी घटनास्थळी दाखल झाले. संबंधित व्यक्तींकडील आधारकार्ड, मतदार ओळखपत्र आणि इतर उपलब्ध कागदपत्रांची तपासणी करण्यात आली.

प्रवासादरम्यान रेल्वे सेवेत बदल झाल्याने काही प्रवाशांना बसमार्गे पुढील प्रवास करावा लागत असल्याची माहिती समोर आली आहे. अधिकाऱ्यांकडून प्रवासाची साखळी आणि ओळख यांचा तपशील तपासला जात आहे.