पत्नीच्या निधनामुळे नैराश्यातून पाऊल उचलल्याचा संशय
फोंडा : म्हार्दोळ येथील प्रसिद्ध वैद्यकीय व्यावसायिक आणि अनेकांसाठी आधारवड ठरलेले डॉ. अजय पेडणेकर (वय ६३) यांचे शनिवारी सायंकाळी सिमेंपायन येथील निवासस्थानी निधन झाल्याची धक्कादायक घटना समोर आली. या घटनेमुळे फोंडा परिसरात शोककळा पसरली असून, त्यांना ओळखणाऱ्यांमध्ये हळहळ व्यक्त केली जात आहे.
मिळालेल्या माहितीनुसार, काही महिन्यांपूर्वी त्यांच्या पत्नी संजिता पेडणेकर यांचे अल्पशा आजाराने निधन झाले होते. या धक्क्यातून ते पूर्णपणे सावरू शकले नव्हते. पत्नीच्या स्मरणार्थ दोन महिन्यांपूर्वी त्यांनी राज्यस्तरीय सिनेगीत गायन स्पर्धेचे आयोजन केले होते.
तरीही त्यांच्या जवळच्या व्यक्तींमध्ये ते या दुःखातून पूर्णपणे बाहेर आले नसल्याची भावना व्यक्त केली जात होती.
मागील काही दिवसांपासून त्यांनी रुग्णांची तपासणी करणे आणि दवाखान्यात नियमित जाणे थांबवले होते, अशी माहिती समोर आली आहे. त्यांच्या निधनानंतर अनेकांनी त्यांच्या कार्याची आठवण काढत शोक व्यक्त केला.
फोंडा आयएमएचे माजी उपाध्यक्ष म्हणून डॉ. अजय पेडणेकर यांनी जबाबदारी सांभाळली होती. वैद्यकीय क्षेत्राबरोबरच सामाजिक आणि सांस्कृतिक उपक्रमांमध्येही त्यांचा सहभाग होता.
गोरगरीब जनतेचे डॉक्टर अशी त्यांची ओळख निर्माण झाली होती. त्यांच्या निधनामुळे वैद्यकीय आणि सामाजिक क्षेत्रात मोठी पोकळी निर्माण झाल्याच्या भावना व्यक्त होत आहेत.
