मनोज परब यांच्या निर्णयामुळे मनाला तीव्र दुःख

पणजी : ‘आरजीपी’चे प्रमुख मनोज परब यांनी राजकीय संन्यास घेण्याचा घेतलेला निर्णय पाहून मला दुःख झाले असून तो माझ्या मनाला लागला आहे. मात्र, सध्या सुरू असलेला हा वाद पक्षाच्या अंतर्गत लोकशाहीचा भाग असून, सर्व बाजू समजून घेतल्याशिवाय कोणतेही बेजबाबदार वक्तव्य करणार नाही, असे सांत आंद्रेचे आमदार वीरेश बोरकर यांनी स्पष्ट केले.

गेल्या महिनाभरापासून आरजीपीमध्ये सुरू असलेल्या अंतर्गत मतभेदांच्या पार्श्वभूमीवर पक्षाचे प्रमुख मनोज परब यांनी अध्यक्षपद आणि संस्थापक सदस्यपदाचा राजीनामा देत राजकारणातून संन्यास जाहीर केला होता. त्यानंतर आमदार वीरेश बोरकर यांनी कोणतीही सार्वजनिक प्रतिक्रिया दिली नव्हती. अखेर सोमवारी विधानसभेतील चेंबरमध्ये आयोजित पत्रकार परिषदेत त्यांनी प्रथमच याबाबत भूमिका स्पष्ट केली.

हा वाद पक्षाच्या अंतर्गत लोकशाहीचा भाग असल्याचे सांगत बोरकर यांनी संबंधित आरोपांवर पक्ष कार्यालयात जाऊन पदाधिकाऱ्यांशी चर्चा करणार असल्याचे सांगितले. मनोज परब यांनी राजीनामा का दिला, याबाबतची कारणे चर्चा झाल्यानंतरच स्पष्ट होतील, असेही त्यांनी नमूद केले.

मनोज परब यांना पुन्हा पक्षात घेण्याचा निर्णय मी एकट्याने घेऊ शकत नाही. याबाबत पक्षाच्या सामूहिक निर्णय प्रक्रियेचा आदर केला जाईल, असेही त्यांनी स्पष्ट केले.

आपण पक्ष सोडून काँग्रेस किंवा अन्य कोणत्याही पक्षात जाणार असल्याच्या अफवा पसरवल्या जात आहेत; मात्र त्यात कोणतेही तथ्य नसल्याचे बोरकर यांनी स्पष्ट केले. गोमंतकीयांच्या हितासाठी स्थापन झालेला आरजीपी पुढे जावा, अशीच आमची भूमिका असल्याचे त्यांनी सांगितले.

काँग्रेस आणि भाजप कसे काम करतात हे आम्हाला माहिती आहे. त्यामुळे या चर्चांवर वारंवार स्पष्टीकरण देण्याची गरज नाही, असेही त्यांनी नमूद केले.