राज्यात आता भौगोलिक स्थितीनुसार ठरणार जमिनीचे दर

पणजी : राज्यात आता संपूर्ण गावासाठी एकच जमीनदर लागू करण्याऐवजी पंचायतीतील भौगोलिक स्थिती, उपलब्ध सुविधा आणि स्थानिक वापराच्या स्वरूपानुसार जमिनीचे वेगवेगळे दर निश्चित केले जाणार आहेत. या नव्या धोरणाची सुरुवात प्रायोगिक तत्त्वावर ताळगावपासून करण्यात येणार असून यासंदर्भातील अधिकृत अधिसूचना महसूल खात्याने जारी केली आहे.

सध्या प्रायोगिक तत्त्वावर ताळगाव पंचायत क्षेत्रात नवीन जमीनदर निश्चित करण्याची प्रक्रिया सुरू होणार आहे. त्यानंतर टप्प्याटप्प्याने संपूर्ण राज्यात ही प्रणाली लागू करण्याचा सरकारचा मानस आहे.

किनारपट्टी आणि अंतर्गत भागांतील जमिनींमध्ये मूल्याचा मोठा फरक असतो. त्यामुळे सर्व भागांसाठी एकच दर ठेवणे व्यवहार्य नसल्याचे महसूल खात्याचे मत आहे.

कळंगुट, बागा, वागातोर आणि हणजूण यांसारखे किनारी भाग आणि गावांच्या आतील क्षेत्र यांना समान दर लागू करणे अन्यायकारक ठरत असल्याची भूमिका या निर्णयामागे आहे. त्यामुळे आता सुविधांच्या उपलब्धतेनुसार आणि प्रत्यक्ष वापरानुसार जमीनदर निश्चित केले जाणार आहेत.

नवीन प्रणाली लागू झाल्यानंतर एकाच गावातील वेगवेगळ्या भागांना त्यांच्या प्रत्यक्ष मूल्य आणि सुविधांच्या आधारे स्वतंत्र जमीनदर लागू होऊ शकतील. त्यामुळे जमीन व्यवहार आणि मूल्यांकन अधिक स्थानिक स्वरूपाचे होण्याची शक्यता व्यक्त केली जात आहे.