साहित्य
चिकन: ५०० ग्रॅम (स्वच्छ धुवून घेतलेले)
कांदे: ३ मध्यम (बारीक चिरलेले)
टोमॅटो: २ मध्यम (प्युरी किंवा बारीक चिरलेले)
आले-लसूण पेस्ट: २ मोठे चमचे
दही: ३-४ मोठे चमचे (फेटलेले)
तेल किंवा तूप: ३-४ मोठे चमचे
कोरडे मसाले:
हळद: १/२ छोटा चमचा
लाल तिखट: २ छोटे चमचे (आवडीनुसार)
धने पूड: १ मोठा चमचा
जिरे पूड: १ छोटा चमचा
गरम मसाला: १ छोटा चमचा
मीठ: चवीनुसार
अख्खे गरम मसाले: १ तमालपत्र, १ दालचिनीचा तुकडा, २-३ लवंगा, २ हिरवी वेलची.
सजावटीसाठी: ताजी कोथिंबीर आणि आल्याचे सुईसारखे पातळ काप.
कृती:
उत्तर भारतीय पद्धतीची चिकन करी तयार करण्यासाठी सर्वात आधी ५०० ग्रॅम स्वच्छ धुवून घेतलेल्या चिकनला थोडे मीठ, हळद आणि १ मोठा चमचा आले-लसूण पेस्ट लावून १५-२० मिनिटे मॅरिनेट करण्यासाठी बाजूला ठेवा. त्यानंतर कढईत किंवा कुकरमध्ये ३-४ मोठे चमचे तेल किंवा तूप गरम करून त्यात १ तमालपत्र, १ दालचिनीचा तुकडा, २-३ लवंगा आणि २ हिरव्या वेलचीची फोडणी द्या. मसाल्यांचा सुगंध सुटू लागला की त्यात ३ मध्यम आकाराचे बारीक चिरलेले कांदे टाकून ते मध्यम आचेवर सोनेरी होईपर्यंत नीट परतून घ्या आणि मग उरलेली १ चमचा आले-लसूण पेस्ट टाकून तिचा कच्चा वास जाईपर्यंत परता.
आता यामध्ये १/२ छोटा चमचा हळद, २ छोटे चमचे लाल तिखट, १ मोठा चमचा धने पूड आणि १ छोटा चमचा जिरे पूड घालून थोडे पाण्याचे हबके मारत तेल सुटेपर्यंत मसाला परता. मसाला तयार झाला की त्यात २ मध्यम टोमॅटोची प्युरी टाकून ३-४ मिनिटे शिजवा, त्यानंतर गॅस कमी करून ३-४ मोठे चमचे फेटलेले दही टाका आणि मिश्रण सतत हलवत राहा. या तयार ग्रेव्हीमध्ये मॅरिनेट केलेले चिकन टाकून मोठया आचेवर ५-७ मिनिटे चांगले परतून घ्या, जेणेकरून मसाल्यांची चव चिकनमध्ये उतरेल.
शेवटी गरजेनुसार साधारण १ ते १.५ कप कोमट पाणी घालून कुकरमध्ये २ शिट्ट्या करून घ्या किंवा कढईवर झाकण ठेवून चिकन मऊ होईपर्यंत शिजवा. चिकन शिजल्यावर त्यात १ छोटा चमचा गरम मसाला आणि चवीनुसार मीठ मिसळा. तयार झालेली गरमागरम चिकन करी ताजी कोथिंबीर आणि आल्याच्या पातळ कापांनी सजवून जिरा राईस किंवा तंदूरी रोटीसोबत खाण्यासाठी सर्व्ह करा.
- शिल्पा रामचंद्र, मांद्रे
