आरोपींवर गुन्हा नोंदवण्यास चालढकल होत असल्याचा आरोप
म्हापसा : शहरातील अलंकार थिएटर परिसरात असलेल्या हजारे फास्टफूडवर मध्यरात्री चार जणांनी अचानक हल्ला केल्याची धक्कादायक घटना घडली. या हल्ल्यात राहुल हळदणकर (२९ वर्षे, रा. अन्साभाट) हा गंभीर जखमी झाला असून; त्याच्यावर उपचार सुरू आहेत.
मिळालेल्या माहितीनुसार, मध्यरात्री १२.३०च्या सुमारास चार संशयितांनी फास्टफूड दुकानात (Fastfood Shop) येत वाद घालत मारहाण सुरू केली. या हल्ल्यात राहुल हळदणकर याला गंभीर दुखापत झाली. परिसरात काही काळ तणावाचे वातावरण निर्माण झाले.
घटनेनंतर जखमी राहुल याला तातडीने उपचारासाठी रुग्णालयात दाखल करण्यात आले. दरम्यान, या प्रकरणी पोलिसांकडून (Goa Police) गुन्हा नोंदवण्यात चालढकल होत असल्याचा आरोप स्थानिकांकडून करण्यात येत आहे. त्यामुळे नागरिकांमध्ये संताप व्यक्त होत असून; आरोपींवर तातडीने कारवाई करण्याची मागणी जोर धरत आहे. या घटनेचा अधिक तपास म्हापसा पोलीस (Mapusa Police) करत आहेत.
