नवी दिल्ली : पश्चिम आशियातील तणावपूर्ण परिस्थिती आणि इराण युद्धाच्या पार्श्वभूमीवर पंतप्रधान नरेंद्र मोदी (Narendra Modi) आज सकाळी ११.३० वाजता राष्ट्रीय राजधानीत सुरक्षा कॅबिनेट समितीची (CCS) महत्त्वपूर्ण बैठक घेणार आहेत. अधिकृत सूत्रांच्या माहितीनुसार, विविध मंत्रालये आणि विभागांनी केलेल्या तयारीचा आढावा या बैठकीत घेतला जाणार आहे.
या बैठकीनंतर पंतप्रधान ‘कॅबिनेट कमिटी ऑन इकॉनॉमिक अफेयर्स’ला (CCEA) देखील संबोधित करणार आहेत. संसदेत स्वतंत्र कॅबिनेट बैठकीलाही उपस्थित राहणार आहेत. देशाच्या एकूण आर्थिक आणि सुरक्षात्मक स्थितीचा व्यापक आढावा घेण्यावर भर असेल.
ऊर्जा सुरक्षा, पुरवठा साखळीवर लक्ष
सध्याच्या जागतिक परिस्थितीत ऊर्जा सुरक्षा, पुरवठा साखळीची स्थिरता आणि अत्यावश्यक वस्तूंची उपलब्धता यांसारख्या मुद्द्यांवर विशेष लक्ष केंद्रित केले जात आहे. सरकारकडून राष्ट्रीय तयारीची सातत्याने पाहणी केली जात असून, संभाव्य अडचणींना तोंड देण्यासाठी आवश्यक उपाययोजना आखल्या जात आहेत.
१ एप्रिलला झालेल्या बैठकीत घेतला होता आढावा
याआधी १ एप्रिल रोजीही पंतप्रधान मोदी यांनी सीसीएसची (CCS) विशेष बैठक घेतली होती. त्या वेळी पश्चिम आशियातील घडामोडींचा आढावा घेत ऊर्जा पुरवठा, खतांची उपलब्धता आणि व्यापक आर्थिक स्थैर्य या मुद्द्यांवर चर्चा झाली होती. पेट्रोलियम पदार्थांचा अखंड पुरवठा, वीज उपलब्धता आणि शेतीसाठी आवश्यक घटक सुनिश्चित करण्यासाठी विविध उपाययोजना करण्यात आल्या होत्या.
केंद्र सरकारचे परिस्थितीवर लक्ष
दरम्यान, जागतिक पातळीवरील अस्थिरतेचा भारताच्या अर्थव्यवस्थेवर, अन्न व इंधन सुरक्षेवर होणारा परिणाम लक्षात घेऊन केंद्र सरकार सतत परिस्थितीवर बारकाईने लक्ष ठेवून आहे. विविध स्तरांवर आपत्कालीन योजना आणि पर्यायी उपाययोजना तयार ठेवण्यात आल्या आहेत.
